सिँचाइ तथा जलस्रोत व्यवस्थापन आयोजना भानु तनहुँले सिँचाइ र पहिरो नियन्त्रणका लागि रु १५ करोड ७५ लाख बराबरका विभिन्न योजना सञ्चालन गरेको छ।
आयोजना प्रमुख सुपिन्द्र खत्रीका अनुसार पाँचवटा ठूला आयोजनामा प्रत्येकमा रु तीन करोड विनियोजन गरिएको छ। ती आयोजना यस प्रकार छन्:
- दासढुङ्गा त्रिशूली नदी बृहत् लिफ्ट सिँचाइ आयोजना, देवघाट गाउँपालिका–५
- जरायो खोला नहर सिँचाइ, रु तीन करोड
- शिशाघाट उपत्यका लिफ्ट सिँचाइ आयोजना, व्यास नगरपालिका–६
- भानु चुँदी वराह सिँचाइ आयोजना, भानु नगरपालिका–४
- टार बजार संरक्षण कार्यक्रम, शुक्लागण्डकी नगरपालिका
साथै, देवघाट गाउँपालिका–५ स्थित गलेश्वर आश्रम–तातोपानीमा पहिरो नियन्त्रणका लागि पनि रु तीन करोड बजेट विनियोजन गरिएको छ।
यस्तै, मर्स्याङ्दी तथा दरौदी नदी नियन्त्रणका लागि रु ७५ लाख विनियोजन गरिएको छ। कार्यालयले तनहुँसहित लमजुङ, मनाङ र गोरखामा पनि काम गर्दै आएको छ।
सिँचाइ तथा जलस्रोत व्यवस्थापन कार्यालय भानु तनहुँ पहिले पालुङटार कुण्डुटार सिँचाइ आयोजना नाममा स्थापना भएको थियो। आर्थिक वर्ष २०७५/७६ देखि काम सुरु भई, आर्थिक वर्ष २०८१/८२ मा कार्यालयको नाम परिवर्तन गरी गोरखा क्षेत्रसमेत समेटिएको थियो। चालु आर्थिक वर्ष २०८२/८३ बाट भानु तनहुँको नाममा स्थानान्तरण गरिएको छ।
कार्यालयले चार जिल्लामा विभिन्न सिँचाइ संरचना निर्माण, नदी क्षेत्रमा डुबान तथा कटानबाट प्रभावित वा जोखिमयुक्त स्थानमा तटबन्धन, स्पर, रिभेटमेन्ट, जग्गा उकास, नदी नियन्त्रण, सर्भेक्षण र अध्ययन कार्य गर्दै आएको प्रमुख खत्रीले जानकारी दिएका छन्।