नेपाली कांग्रेसमा विशेष महाधिवेशनको माग चर्को रुपमा उठेको छ। मुलुकका ठूला राजनीतिक दलहरूमा नेतृत्व परिवर्तनको बहस चलिरहेका बेला कांग्रेसमा नयाँ नेतृत्व छान्न विशेष महाधिवेशन बोलाउने विषयमा विभिन्न तहमा छलफल भइरहेको छ।
यस विषयमा सभापति शेरबहादुर देउवाले नेताहरूसँग टेलिफोन संवादमार्फत छलफल गरिरहेका छन्। जेन-जी आन्दोलनका क्रममा आक्रमणमा परी घाइते भएका देउवा भौतिक रूपमा भेट्न नसके पनि टेलिफोनबाट नेताहरूसँग वार्ता गरिरहेका छन्।
असोज २६ गते केन्द्रीय समिति बैठक बोलाइएको छ। बैठकअघि महाधिवेशन प्रतिनिधिहरूले विशेष महाधिवेशन डाक्ने हस्ताक्षर बुझाउने तयारी गरिरहेका छन्।
महाधिवेशनका लागि हस्ताक्षर अभियान
कांग्रेस महामन्त्री विश्वप्रकाश शर्माले सामाजिक सञ्जालमा भिडियो सन्देश जारी गर्दै महाधिवेशन प्रतिनिधिहरूलाई असोज २४ भित्र हस्ताक्षर गर्न अपिल गरेका छन्। उनले विश्वास व्यक्त गरेका छन् कि विशेष महाधिवेशन गर्दा पार्टी थप बलियो हुनेछ।
जेन-जी आन्दोलनपछि सभापति देउवाले असोज २६ गते केन्द्रीय समिति बैठक बोलाएपछि, संस्थापन इतर पक्षले विशेष महाधिवेशनका लागि हस्ताक्षर संकलन अभियान सुरु गरेको हो।
नेतृत्व परिवर्तनका प्रयास
महामन्त्रीद्वय गगनकुमार थापा र विश्वप्रकाश शर्मा तथा नेता डा. शेखर कोइरालाले छुट्टाछुटै लबिइङ गर्दै नेतृत्व परिवर्तनको तयारी गरिरहेका छन्। विशेष महाधिवेशनका लागि हस्ताक्षर अभियानको नेतृत्व गुरुराज घिमिरेले गरिरहेका छन्।
महामन्त्री थापाले पार्टी पुनर्संरचना र सुधारका लागि आफू पद त्याग्न तयार रहेको घोषणा गरेका छन्। उनका अनुसार:
“पार्टीमा आमूल सुधारका लागि हामी पद छाड्न पनि तयार हुनुपर्छ, नयाँ जोखिम उठाउन तयार रहनुपर्छ। हामीबाट गल्ती भएको छ, आत्मसमीक्षा र पुनर्मूल्यांकन गरेर पार्टीलाई पुनर्निर्माण गरौं।”
विधानअनुसार प्रक्रिया
कांग्रेसमा अहिले ४,७४३ महाधिवेशन प्रतिनिधि छन्। विधानअनुसार महाधिवेशन प्रतिनिधिको ४० प्रतिशतले हस्ताक्षर गरेमा विशेष महाधिवेशन डाक्न सकिने प्रावधान छ। महासमिति सदस्य देवराज चालिसेले भने:
“पहिला त विधिसम्मत प्रक्रिया अपनाउँछौं, नभए विधानले दिएको अधिकार प्रयोग गर्न बाध्य हुनेछौं।”
हाल केन्द्रीय समितिमा देउवाको स्पष्ट बहुमत रहेकोले विशेष महाधिवेशन बोलाउने सम्भावना कम छ। तर पछिल्लो राजनीतिक घटनाक्रमले इतर पक्ष बलियो देखिएका छन्।
नेताहरू अलमलमा
इतर समूहले नेतृत्व परिवर्तनको पक्षमा निरन्तर छलफल र लबिइङ गरिरहेको छ। यसबीच कांग्रेस नेताहरू कृष्ण सिटौला, प्रकाशमान सिंह, विमलेन्द्र निधि, गोपालमान श्रेष्ठ भने विशेष महाधिवेशन वा नियमित महाधिवेशन कता जाने भन्नेमा स्पष्ट दृष्टिकोण सार्वजनिक गरेका छैनन्।