स्याङ्जाको वालिङ नगरपालिका–५ बाहुनडाँडामा दुई समूहबीच झडप हुँदा ३२ वर्षीय ढालबहादुर थापाको गएराति मृत्यु भएको छ।
प्रहरीका अनुसार, वालिङ–७ केवेरेभञ्ज्याङमा स्थानीय र चापाकोटबासीबीच मोटरसाइकल पड्काएर चलाएको आरोपलाई लिएर झगडा सुरु भएको थियो। झडपमा गम्भीर घाइते भएका थापालाई प्राथमिक उपचारपछि गण्डकी मेडिकल कलेज, पोखरा रिफर गरिएको थियो। तर चिकित्सकले उपचारक्रममै राति साढे १ बजे उनलाई मृत घोषित गरेका हुन्।
जिल्ला प्रहरी प्रमुख दधिराम न्यौपानेले घटनामा संलग्न दुई जनालाई नियन्त्रणमा लिएको जानकारी दिनुभएको छ। पक्राउ पर्नेमा हरिनास गाउँपालिका–५ का २२ वर्षीय सिजन थापा र चापाकोट नगरपालिका–५ का २४ वर्षीय अनिल शाही रहेका छन्। उनीहरूलाई आज बिहान करिब ९ बजे वडा प्रहरी कार्यालय वालिङको हिरासतमा राखिएको छ।
प्रहरीले घटनामा संलग्न अन्य व्यक्तिको खोजी भइरहेको र आवश्यक अनुसन्धान अघि बढिरहेको जनाएको छ।