उत्तरी जापानको तटीय क्षेत्रमा आइतबार साँझ ६.७ म्याग्निच्युडको शक्तिशाली भूकम्प गएको छ। जापान मौसम विज्ञान एजेन्सीका अनुसार भूकम्प इवाते प्रिफेक्चरको तटमा समुद्री सतहभन्दा करिब १० किलोमिटर गहिराइमा गएको हो।
भूकम्प जापानको स्थानीय समय अनुसार साँझ ५ बजेतिर महसुस गरिएको थियो। त्यसपछि थप कम्पनहरू महसुस भएपछि अधिकारीहरूले सुनामीको चेतावनी जारी गरेका छन्।
जापानको सार्वजनिक प्रसारक एनएचके (NHK) का अनुसार स्थानीय अधिकारीहरूले तटीय क्षेत्रमा बसोबास गर्ने सर्वसाधारणलाई सावधानी अपनाउन र सुरक्षित स्थानमा सारिन आग्रह गरेका छन्।
हालसम्म क्षति वा मृत्युको विस्तृत विवरण प्राप्त नभए पनि, प्रारम्भिक रिपोर्टअनुसार क्षेत्रका दुई आणविक ऊर्जा केन्द्रहरू सुरक्षित रहेको जनाइएको छ।
जापान मौसम विज्ञान एजेन्सीले १ मिटर सम्मको सम्भावित सुनामी तटीय क्षेत्रमा आउन सक्ने चेतावनी जारी गरेको छ र थप कम्पनहरूको सम्भावना अझै कायम रहेको जनाएको छ।