पूर्वमन्त्री तथा नेतृ रामकुमारी झाँक्रीले आफूलाई ट्रोल गरे पनि स्वीकार्य भएको प्रतिक्रिया दिएकी छन्।
नेकपा (एमाले) मा पुनः फर्किएकी झाँक्रीले राष्ट्रिय सभा गृहमा आयोजित एमाले फर्क अभियानमा सम्बोधन गर्दै भनिन्—
“विगत र वर्तमानलाई दाँजेर ट्रोल गरे पनि मलाई स्वीकार छ। जनताको रक्षक र भरोसाको पार्टी एमाले नै हो।”
बिना सर्त एमालेमा फर्किएको घोषणा
झाँक्रीले चार वर्षअघि पार्टी विभाजनको समयमा नेकपा (एकीकृत समाजवादी) रोजेकी थिइन्।
तर, अहिले उनले “बिना सर्त एमालेमा फर्किएको” स्पष्ट गर्दै भनिन्—
“चार वर्षअघि अलग भएका थियौं, तर आज हामी अनेक नेताहरूसहित बिना सर्त एमालेमा फर्किएका छौं।”
उनका अनुसार विगतमा भएका निर्णयहरू त्यसबेलाको परिस्थितिअनुसार नै सही ठानेको बताउँदै उनले थपिन्—
“इतिहासमा मबाट जे भएको थियो, त्यसको सजाय म समयलाई दिन तयार छु। आज हामी पुनः एउटै लक्ष्यसहित एमालेमा एकजुट भएका छौं।”
‘कम्युनिस्ट आन्दोलन र राष्ट्रिय समृद्धिको बाटो एमालेबाटै’
झाँक्रीले एमालेलाई मात्र कम्युनिस्ट आन्दोलन र राष्ट्रिय समृद्धिको मूल बाटो बताइन्।
उनले भनिन्—
“एमालेबाट मात्रै देशलाई जनजीविका र समृद्धितर्फ डोर्याउन सकिन्छ। यो आन्दोलन मेरो लागि मात्र होइन, देशकै आवश्यकता हो।”
‘जेनजी आन्दोलनको नाममा रोटी सेक्ने काम भयो’
उनले दुई महिनाअघिको जेनजी आन्दोलनलाई लिएर पनि तीखो टिप्पणी गरिन्।
झाँक्रीले भनिन्—
“जेनजी आन्दोलनको नाममा सरकारविरोधी गतिविधि चले। सिंहदरवार, संसद भवन, सर्वोच्च अदालत जलाइयो।
तर त्यसलाई ‘ठीक’ भन्नेहरू अहिले पनि छन्। यस्तो अवस्था कोहीले कल्पना गरेका थिएनन्।”
उनले सोधिन्—
“यदि त्यो आन्दोलन सरकारविरोधी थिएन भने, सरकारसँग माग कसले प्रस्तुत गरेको थियो?
सरकारी र निजी भवन जलाइँदा पनि सही ठान्नेहरूको सोच खतरनाक हो।”