इजरायली सेनाको एकपछि अर्को हवाई तथा ड्रोन आक्रमणबाट गाजामा आइतबार बिहानदेखि मात्रै ३३ प्यालेस्टिनी नागरिकको ज्यान गएको छ। प्यालेस्टिनी चिकित्सा स्रोतहरूले दिएको जानकारीअनुसार दर्जनौं नागरिक गम्भीर घाइते भएका छन्।
दक्षिण गाजाको प्रमुख सहर खान युनिसमा नासेर अस्पतालले जारी गरेको विज्ञप्तिअनुसार कम्तिमा १० जनाको मृत्यु भएको पुष्टि गरिएको छ। स्थानीय रिपोर्टहरू अनुसार एकै परिवारका तीन सदस्यहरू आफ्नै घर फर्कंदै गर्दा आक्रमणको चपेटामा परे।
खान युनिसको दक्षिणतर्फ भएको ड्रोन आक्रमणमा पाँच जना प्यालेस्टिनीको मृत्यु भएको छ। त्यस्तै, उत्तरी गाजास्थित बेइत लाहिया क्षेत्रमा नागरिकहरूलाई लक्षित गरेर गरिएको आक्रमणपछि सात जना घाइतेहरूलाई अल-शिफा अस्पतालमा सारिएको जनाइएको छ।
दक्षिण गाजाकै रफाह सहरमा रहेको सहायता वितरण केन्द्र नजिकै गरिएको अर्को आक्रमणमा दुई जना मारिएका छन् भने ५० भन्दा बढी नागरिक घाइते भएका छन्। मध्य गाजा पट्टीको सहायता वितरण केन्द्र नजिकै फेरि तीन जना नागरिकले ज्यान गुमाएका छन्।
नुसेरात क्षेत्रमा गरिएको तोपखाना आक्रमणले एक अपार्टमेन्टलाई लक्षित गर्दा एक जनाको मृत्यु भएको छ भने धेरै जना घाइते भएका छन्।
इजरायली सेनाले अहिलेसम्म उक्त आक्रमणबारे औपचारिक प्रतिक्रिया दिएको छैन। यद्यपि, मार्च १८ देखि इजरायलले गाजामा पुनः सैन्य कारबाही सुरु गरेपछि मृतकको संख्या तीव्र रूपमा बढ्दै गएको छ।
पछिल्लो रिपोर्टअनुसार, इजरायली आक्रमणबाट हालसम्म गाजामा ५५,३६२ जना प्यालेस्टिनीको मृत्यु भइसकेको छ भने १,२८,७४१ जना घाइते भएका छन्। पछिल्लो आक्रमणपछि मानवीय संकट झनै भयावह बन्दै गएको छ।