भारतबाट अवैध रूपमा नेपाल भित्र्याइएका पटका सुनसरी प्रहरीले बरामद गरेको छ। जिल्ला प्रहरी कार्यालय सुनसरीको टोलीले असोज २१, २२ र २३ गते विशेष अभियान सञ्चालन गरी विभिन्न स्थानबाट करिब दुई लाख ६० हजार रुपैयाँ बराबरका पटका बरामद गरेको हो।
विशेष अभियान र बरामद सामग्री
तीन दिनसम्म चलाइएको अभियानका क्रममा लुकाइ–छिपाइ राखिएका विभिन्न प्रकारका पटका प्रहरीले नियन्त्रणमा लिएको हो।
जिल्ला प्रहरी कार्यालय सुनसरीका डिएसपी योगराज खतिवडाका अनुसार, बरामद गरिएका सामग्री हाल प्रहरीको नियन्त्रणमा राखी कानुनी प्रक्रिया अघि बढाइएको छ।
दसैं–तिहार अगाडि अवैध पटका रोक्न प्रहरी सक्रिय
दसैं र तिहार पर्व नजिकिँदै गर्दा भारतबाट पटका चोरी–पछारी गरी ल्याउने क्रम बढेको भन्दै प्रहरीले यसपटक विशेष अनुगमन अभियान सञ्चालन गरेको हो।
सुनसरी प्रहरीले सीमाक्षेत्रका नाका र बजार क्षेत्रमा निगरानी थप गर्ने तयारी गरेको जनाएको छ।