ऊर्जा, जलस्रोत तथा सिँचाइमन्त्री कुलमान घिसिङले नेपालका जलविद्युत् र सौर्य ऊर्जामा लगानी गर्न अन्तर्राष्ट्रिय समुदायलाई आह्वान गरेका छन्।
नेपालको स्वच्छ ऊर्जा यात्राले नयाँ युगतर्फ प्रवेश गरेको बताउँदै उनले मित्र राष्ट्रहरू र लगानीकर्ताहरूलाई “नेपालमा लगानी गर्नुहोस्, नवीकरणीय ऊर्जामा लगानी गर्नुहोस्, र हरित भविष्यको हिस्सा बन्नुहोस्” भनेर आग्रह गरे।
दक्षिण एशियाली स्वच्छ ऊर्जा रूपान्तरणमा नेपालको भूमिका
मन्त्री घिसिङले मंगलबार “विशाल ऊर्जा सम्भावनाको दिगो विकास र त्रिपक्षीय विद्युत् व्यापार (नेपाल–भारत–बंगलादेश) का लागि मार्गचित्र” विषयक अन्तर्राष्ट्रिय सत्रमा विशेष सम्बोधन गरेका थिए।
उनका अनुसार, नेपालको जलविद्युत् दक्षिण एशियाकै स्वच्छ ऊर्जा रूपान्तरणको रणनीतिक सक्षमकर्ता स्रोत बनेको छ।
नेपालको जलविद्युत् क्षेत्रीय लचिलो ग्रिड प्रणाली र स्थिर आपूर्तिका लागि अत्यावश्यक भएको उनले बताए।
१५ हजार मेगावाट ऊर्जा निर्यातको लक्ष्य
घिसिङले सन् २०३५ सम्ममा १५,००० मेगावाट नवीकरणीय ऊर्जा निर्यात गर्ने लक्ष्य रहेको बताए।
नेपाल–भारतले संयुक्त रूपमा उच्च क्षमताका प्रसारण लाइन पूर्वाधार पहिचान गरी निर्माण कार्य अघि बढाएको पनि उनले जानकारी दिए।
नेपालसँग ८३,००० मेगावाट जलविद्युत् सम्भावना र ४२,००० मेगावाट पम्प स्टोरेज सम्भावना रहेको घिसिङको भनाइ छ।
यी ऊर्जास्रोतहरू छिमेकी देशहरूको सौर्य र वायु ऊर्जासँग परिपूरक रूपमा काम गर्न सक्ने उनले बताए।
क्षेत्रीय सहकार्य र ग्रिड सञ्जालको विस्तारमा जोड
मन्त्री घिसिङका अनुसार, क्षेत्रीय तथा विश्वव्यापी ग्रिड सञ्जाल विस्तारले
ऊर्जा प्रवाह सन्तुलन, लागत घटाउने र विद्युत् पहुँच विस्तारमा सहयोग पुर्याउनेछ।
उनले बिम्सटेक (BIMSTEC) सदस्य राष्ट्रहरूबीच पूर्ण रूपमा आबद्ध ग्रिडको जग बसाल्न
नेपाल–भारत र भारत–बंगलादेशबीचको प्रसारण पूर्वाधार सुदृढ गर्न आवश्यक रहेको बताए।
जलवायु परिवर्तन र ऊर्जा सुरक्षामा संयुक्त प्रयास आवश्यक
उनले जलवायु परिवर्तनका कारण ऊर्जा प्रणाली र जनजीवनमा परिरहेको क्षति
न्यूनीकरणका लागि क्षेत्रीय र अन्तर्राष्ट्रिय सहकार्य सुदृढ गर्नुपर्नेमा जोड दिए।
नेपालले स्वच्छ, हरित र दिगो ऊर्जा विकासको बाटो लिँदै
विश्व ऊर्जा रूपान्तरणमा सशक्त योगदान दिने लक्ष्य लिएको उनले उल्लेख गरे।