नेकपा (एकीकृत समाजवादी) ले नेकपा (माओवादी केन्द्र) सँग एकता गर्ने निर्णय गरेपछि पार्टीभित्र ठूलो विभाजन देखिएको छ। अध्यक्ष माधवकुमार नेपालको प्रस्तावमा बहुमतले समर्थन गरे पनि वरिष्ठ नेता झलनाथ खनाल, महासचिव घनश्याम भुसाल र नेतृ रामकुमारी झाँक्रीलगायत नेताहरू खुला असन्तुष्ट बनेका छन्।
शुक्रबार सम्पन्न केन्द्रीय समिति बैठकमा अध्यक्ष नेपालले माओवादीसँग पार्टी एकता प्रस्ताव राखेपछि अधिकांश सदस्यले ताली बजाएर अनुमोदन गरे। तर, असहमति जनाउने नेताहरूले यो कदमले वाम आन्दोलनलाई सुदृढ होइन, व्यक्तिगत एजेन्डा पूरा गर्ने माध्यम बनाउने आरोप लगाएका छन्।
महासचिव घनश्याम भुसाल र नेतृ झाँक्रीले पार्टी मर्जर वाम एकताको विकल्प नभएको तर्क गरेका छन्। उनीहरूका अनुसार, माओवादीसँगको मर्जरले पार्टीभित्र तानाशाही प्रवृत्ति बढाउने खतरा छ। झाँक्रीले भनिन्, “यो वाम एकता होइन, व्यक्तिगत मर्जर हो। हामी यस्तो प्रक्रियामा सहभागी हुदैनौं।”
यसैबीच, नेकपा (विप्लव) पनि विभाजनमा परेको छ। नेत्रविक्रम चन्द ‘विप्लव’ नेतृत्वको पार्टी दुई धारमा बाँडिएको छ — एक पक्ष माओवादीसँग मिल्ने पक्षमा र अर्को तत्काल नमिल्ने पक्षमा।
चिरण पुनः ‘मिलन’को नेतृत्वमा नयाँ समूह गठन भएको छ। उनले ७५ सदस्यीय केन्द्रीय समिति घोषणा गर्दै आफूहरूलाई बहुमत रहेको दाबी गरेका छन्। विप्लवले भने हालै निर्वाचन आयोगमा नयाँ पार्टी दर्ता गर्न निवेदन दिएका छन्।
विश्लेषण
नेपालको वाम राजनीतिमा फेरि एकपटक एकता र विभाजनको दोहोरो खेल सुरु भएको छ। एकीकृत समाजवादी र माओवादीबीचको सम्भावित मर्जरले वामपन्थी धार पुनः एक ठाउँमा ल्याउने प्रयास भए पनि त्यसको भित्री असन्तोषले दीर्घकालीन स्थायित्वमा प्रश्न खडा गरेको छ।