दुर्गा प्रसाईं नेतृत्वको ‘राष्ट्रियता, धर्म संरक्षण र नागरिक बचाउ महाअभियान’ र सुशीलमान शेरचन नेतृत्वको ‘नेपाली कांग्रेस (बीपी)’ बीच देशव्यापी आन्दोलनमा सहकार्य गर्ने सहमति भएको छ।
आइतबार बिहान भक्तपुरको मध्यपुर ठिमीस्थित प्रसाईंको निवासमा दुबै पक्षबीच ६ बुँदे सहमतिपत्रमा हस्ताक्षर गरिएको हो।
नेपाली कांग्रेस (बीपी) का सभापति सुशीलमान शेरचनका अनुसार, सहकार्यको प्रस्ताव दुर्गा प्रसाईं पक्षबाट आएको थियो।
उनले भने, “हामीले २०८३ सालदेखि आन्दोलनको तयारी गरिरहेका थियौं, तर दुर्गा प्रसाईंले मंसिर ६ गतेदेखि सुरु गर्न लागिएको आन्दोलनमै सहकार्य गर्ने प्रस्ताव गर्नुभयो, र हामी त्यसमा सहमत भयौं।”
सहमति अनुसार, राष्ट्र, धर्म र नागरिक सुरक्षाको सम्मान गर्दै कुनै पनि विभाजनकारी वा हिंसात्मक कार्य नगर्ने उल्लेख गरिएको छ।
सहमतिका मुख्य बुँदाहरू
- मंसिर ६ गतेदेखि सुरु हुने देशव्यापी आन्दोलनमा दुवै पक्षको संयुक्त सहभागिता हुनेछ।
- नेपाली कांग्रेस (बीपी) का नेता, कार्यकर्ता र समर्थकहरू आफ्ना झन्डा, नारा र संगठनात्मक पहिचानसहित अभियानमा सहभागी हुनेछन्।
- आन्दोलनलाई प्रभावकारी बनाउन संयुक्त समन्वय समिति गठन गरिनेछ।
- राष्ट्र, धर्म, लोकतन्त्र र नागरिक अधिकारमाथि परेका आन्तरिक तथा बाह्य चुनौतीको प्रतिवादका लागि जनजागरण र साझा अभियान सञ्चालन गरिनेछ।
दुवै पक्षले नेपालको स्वाधीनता, राष्ट्रियता र धार्मिक सहअस्तित्वको रक्षा गर्न साझा आन्दोलनमार्फत देशव्यापी जनजागरण अभियान सञ्चालन गर्ने प्रतिबद्धता जनाएका छन्।
मुख्य बिन्दुहरू
- दुर्गा प्रसाईं र कांग्रेस (बीपी)बीच ६ बुँदे सहमति
- मंसिर ६ गतेदेखि सुरु हुने आन्दोलनमा सहकार्य
- हिंसामुक्त र राष्ट्रियता–केन्द्रित अभियानको घोषणा
- संयुक्त समन्वय समिति गठनको तयारी