भैरहवास्थित गौतमबुद्ध अन्तर्राष्ट्रिय विमानस्थलमा यात्रु चाप न्यून र व्यावसायिक घाटा बढ्दै गएपछि, सरकारी उच्चस्तरीय अध्ययन तथा सुझाव आयोगले विमानस्थललाई ‘कार्गो उडान हब’का रूपमा विकास गर्न सिफारिस गरेको छ।
आयोगका अनुसार, नागरिक उड्डयन प्राधिकरणले जबर्जस्ती यात्रु उडान बढाउने प्रयास गरे पनि हालको अवस्थामा त्यसको व्यावसायिक सम्भाव्यता देखिएको छैन। त्यसैले विमानस्थलको भौगोलिक स्थिति प्रयोग गरी निर्यातजन्य वस्तु ओसारपसारका लागि प्रयोग गर्न सकिने सुझाव दिइएको हो।
त्रिभुवन अन्तर्राष्ट्रिय विमानस्थलमा निर्यातजन्य वस्तुको चाप बढिरहेको अवस्थामा, गौतमबुद्ध विमानस्थललाई वैकल्पिक कार्गो केन्द्रका रूपमा उपयोग गर्न सकिने आयोगले जनाएको छ।
आयोगले भन्यो — “गौतमबुद्ध विमानस्थलले कार्गोका लागि निर्यात पूर्वाधार केन्द्रका रूपमा रहन सक्ने क्षमता राख्छ। देशको वस्तु निर्यातलाई प्रोत्साहन गर्न अब उच्चस्तरको रणनीतिक कार्यक्रम बनाउने अवसर देखिएको छ।”
साथै, आयोगले नेपाली व्यवसायीलाई वायुयान लिजिङ सुविधा उपलब्ध गराई यस विमानस्थललाई कार्गो एयरलाइन्सको मुख्य बेस बनाउन आह्वान गरेको छ।
यससँगै, लुम्बिनीलाई धार्मिक र सांस्कृतिक गन्तव्यको हब बनाउन अन्तर्राष्ट्रिय प्रवर्द्धन कमजोर भएको भन्दै आयोगले त्यसतर्फ पनि ध्यान दिन सरकारलाई सुझाव दिएको छ।