ऊर्जा, भौतिक पूर्वाधार तथा सहरी विकासमन्त्री कुलमान घिसिङले अब चुनावमा उभिएर देशको नेतृत्व गर्ने इच्छा व्यक्त गरेका छन्। उनलाई संरक्षक मानेर घोषणा गरिएको ‘उज्यालो नेपाल पार्टी’ले राजनीतिक एजेन्डासहित औपचारिक रूपमा आफ्नो घोषणा सभा सम्पन्न गरेको छ।
पार्टीले समानुपातिक समावेशी निर्वाचन प्रणाली आवश्यक रहेको बताउँदै वर्तमान मिश्रित व्यवस्थाबाट स्थिर र प्रभावकारी सरकार निर्माण कठिन रहेको निष्कर्ष निकालेको छ।
बुधबार कमलादी स्थित प्रज्ञा भवनमा आयोजित घोषणासभामा हरियो झन्डा र ‘चिम’ अंकित टोपीसहित पार्टी समर्थकहरूको उपस्थिति उल्लेखनीय थियो। सो अवसरमा पार्टीको दीर्घकालीन दृष्टि, मूल ध्येय, घोषणापत्र २०८२, तथा नीति–कार्यक्रम सार्वजनिक गरियो। पार्टीले “सुशासन, समृद्धि र सामाजिक न्याय” र “उज्यालो नेपालः उज्यालो भविष्य” नारालाई प्राथमिकता दिएको छ।
बौद्धिक वर्गको अग्रपंक्ति
उज्यालो नेपाल पार्टीमा ५१ सदस्यीय केन्द्रीय समिति गठन गरिएको छ। अध्यक्षका रूपमा पूर्वऊर्जा सचिव अनुपकुमार उपाध्याय चयन भएका छन्। पार्टीमा १३ जना डाक्टर, प्राध्यापक र इन्जिनियरहरू छन्, जसले पार्टीलाई ‘बौद्धिक नेतृत्वसहितको नयाँ शक्ति’को रुपमा प्रस्तुत गरेको छ।
केन्द्रीय सदस्यमा इन्जिनियर शंकर ढकाल, तेजनारायण यादव, निलिमा बस्नेत, दीपेन्द्र जमरकट्टेल, अरविन्द साह, राजेन्द्र शाही, साथै डा. ताराप्रसाद जोशी, डा. महेन्द्रसुन्दर लावती, डा. सागर ढकाल लगायतका नाम समावेश छन्। कलाकार रिमा विश्वकर्मा पनि समितिमा परेकी छन्।
कुलमान घिसिङको राजनीतिक संकेत
घोषणासभामा प्रमुख अतिथि रहेका मन्त्री घिसिङले पार्टीमा औपचारिक रूपमा आबद्धता भने खुलाएनन्। तर उनले स्पष्ट रूपमा भने:
“अब चुनाव लडेर देशको नेतृत्व गर्ने मन छ।”
उनले ‘उज्यालो अभियान’बाट ‘उज्यालो नेपाल पार्टी’ बन्नुको पृष्ठभूमि बताउँदै देशका प्रत्येक संकटमा आफू सक्रिय भएको दाबी गरे।
घिसिङले सुशासनको अभावले राजनीतिक नेतृत्व फेल भएको उल्लेख गर्दै भने,
“अब भाषणले होइन, कामले जित्छ। देश बदल्न सक्षम नेतृत्व आउनुपर्छ।”
उनका अनुसार जेन–जी आन्दोलनले भ्रष्टाचारमुक्त देशको माग उठाउँदै नयाँ राजनीतिक चेतना जगाएको छ, र त्यही भावना पार्टीको मूल सोचमा रहेको बताए।
पार्टीका मुख्य ११ राजनीतिक एजेन्डा
१. समानुपातिक समावेशी निर्वाचन प्रणाली
२. प्रदेश र स्थानीय तहको संरचना पुनरावलोकन
३. प्रदेशमा प्रत्यक्ष निर्वाचित मुख्यमन्त्री र ५ सदस्यीय क्याबिनेट
४. प्रदेशमा सांसद हटाई ‘प्रदेश परिषद्’ गठन
५. संघमा गैर–सांसद विज्ञलाई मन्त्री बनाउन सकिने व्यवस्था
६. प्रधानमन्त्रीले आधा कार्यकाल स्थिर रूपमा सरकार सञ्चालन गर्ने ग्यारेन्टी
७. एउटै क्षेत्रबाट लगातार ३ पटक उम्मेदवारी नपाइने
८. समानुपातिक/मनोनीत सांसद एकपटक मात्र
९. स्थानीय तहको गैरदलीय चुनाव
१०. न्यायपालिकामा दलीय हस्तक्षेप रोक्ने संरचना
११. जनस्तरबाट माग भएमा संविधान संशोधनको पक्षमा उभिने
उज्यालो नेपाल पार्टी साउन २७ गते निर्वाचन आयोगमा दर्ता अघि बढाएको थियो। मंसिर ५ गते आयोगबाट दर्ता प्रमाणपत्र पाएको छ। यसको चुनाव चिह्न ‘बलेको चिम’ हो।