नेकपा एमालेका सचिव लेखराज भट्टले प्रधानमन्त्री तथा एमाले अध्यक्ष केपी शर्मा ओलीलाई छोटो समयमा बुझ्न नसकिने बताएका छन्। प्रेस चौतारीले धनगढीमा आयोजना गरेको कार्यक्रममा बोल्दै भट्टले ओलीलाई बुझ्न लामो अध्ययन र अनुसन्धान आवश्यक भएको उल्लेख गरे।
‘हामीले केपी ओलीलाई छोटो समयमा बुझ्न सक्दैनौँ,’ भट्टले भने, ‘मैले बुझेको छु, यहाँ म भन्दा लामो संगत गरेका मानिसहरू पनि छन्, उनीहरूले अझ बढी बुझेका होला।’
ओलीको कदम र निर्णयलाई तत्कालै बुझ्न नसकिने भन्दै भट्टले भने, ‘ओलीले कतिखेर के गर्छन् भन्ने कसैले पहिले बुझ्न सक्दैन। चालेपछि मात्र थाहा हुन्छ।’
नेकपा विभाजनको समयमा आफूले ओलीलाई बुझेर एमाले छानेको र यसैकारण अहिले उनको नेतृत्वलाई संरक्षण गर्नुपर्ने भट्टको भनाइ छ। उनले नेतृत्वको संरक्षणलाई विचारको रक्षा पनि भने।
‘मलाई विश्वास थियो, केपी ओलीलाई साथ दिनुपर्छ, यो पार्टी बन्छ भन्ने,’ भट्टले बताए।