मधेश प्रदेशमा नेकपा (एमाले) का सरोज कुमार यादव नयाँ मुख्यमन्त्री नियुक्त भएका छन्।
संविधानको धारा १६८(३) बमोजिम संसद्को ठूलो दलको हैसियतले एमाले संसदीय दलका नेता यादवलाई प्रदेश प्रमुख सुमित्रा सुवेदी भण्डारीले मुख्यमन्त्रीमा नियुक्त गरेकी हुन्।
प्रदेश प्रमुखको कार्यालयका अनुसार, महोत्तरीको बर्दिबासस्थित पानस कटेज होटलमा मुख्यमन्त्री यादवलाई पद तथा गोपनीयताको सपथ ग्रहण गराइएको हो।
मुख्यमन्त्री बनेलगत्तै यादवले मन्त्रीपरिषद् विस्तार गरेका छन्। उनले मन्त्री पदमा एमालेका लखनलाल दास तत्मा, राष्ट्रिय प्रजातन्त्र पार्टी (राप्रपा) का कन्चन बिच्छा, र संघीय समाजवादी पार्टी नेपालकी विमला अन्सारीलाई नियुक्त गरेका छन्।
तीनै जना मन्त्रीहरूले पनि बिना विभागीय मन्त्रीको रूपमा सपथ ग्रहण गरेका छन्।
मधेश प्रदेशमा नयाँ सरकार गठनसँगै प्रदेशको राजनीतिक समीकरणमा नयाँ मोड आएको देखिएको छ।
राजनीतिक विश्लेषकहरूका अनुसार, एमाले नेतृत्वको सरकार स्थायित्वका दृष्टिले चुनौतीपूर्ण हुने देखिन्छ, किनभने प्रदेशसभामा बहुमतका लागि अन्य दलहरूको समर्थन जरुरी हुनेछ।