शिक्षा, विज्ञान तथा प्रविधि मन्त्रीमा सिफारिस भएका आविष्कारक महावीर पुनले आफूलाई मन्त्री नभन्न आग्रह गरेका छन्। उनले सामाजिक सञ्जालमार्फत पहिलो घोषणा गर्दै, बधाई दिने फोन नगर्न र खादा-माला लिएर नआउन अनुरोध गरेका छन्।
पुनले विज्ञान, प्रविधि र शिक्षामा सुधारका लागि सुझाव र ठोस कामको खाका चाहिएको उल्लेख गरेका छन्। “५ महिनाभित्र गर्न सकिने र गर्नैपर्ने काम वा आइडिया छ भने मेरो ह्वाट्सएपमा पठाउनुहोस्,” उनले भने।
उनले थपे, “मलाई कसैले पनि मन्त्री नभन्नुहोस्। यदि कसैलाई मन्त्री भन्नै रहर छ भने ‘कवाडी वैज्ञानिक मन्त्री’ भन्नुहोस्।”
महावीर पुन विगत लामो समयदेखि ग्रामीण क्षेत्रका लागि इन्टरनेट, स्वास्थ्य र शिक्षा क्षेत्रमा नवप्रवर्तन र अभियान सञ्चालन गर्दै आएका छन्। उनको मन्त्रीमा सिफारिसपछि सामाजिक सञ्जालमा समर्थन र आलोचना दुवै चर्किएको छ।