नेपालले आइसीसी विश्वकप लिग २ अन्तर्गत जारी तेस्रो खेलमा पनि निराशाजनक प्रदर्शन गर्दै अमेरिकासँग ४ विकेटले पराजय ब्यहोरेको छ।
दुबईस्थित ICC एकेडेमी मैदानमा टस हारेर ब्याटिङको निम्तो पाएको नेपालले ४९.५ ओभरमा सबै विकेट गुमाउँदै २७१ रन बनाएको थियो। तर अमेरिकाले ४९ ओभरमै ६ विकेटको क्षतिमा २७३ रन पूरा गर्दै नेपालमाथि लगातार दोस्रो जित हात पार्यो।
अमेरिकाको बलियो साझेदारीले जित दिलायो
अमेरिकाका ब्याटर मिलिन्द कुमार र साइतेजा मुक्कामल्ला बीचको १२३ रनको साझेदारी निर्णायक साबित भयो।
मुक्कामल्लाले सर्वाधिक ७५ रन (१०१ बल, २ चौका, १ छक्का) बनाए भने मिलिन्दले ७० रनको योगदान दिए।
अन्य खेलाडीहरूमा कप्तान मोनांक पटेलले २१ रन, शयान जहांगिरले ३६ रन र स्मिथ पटेलले १६ रन बनाए।
नेपालका बलरमध्ये सन्दीप लामिछानेले ३ विकेट, जबकि करण केसी, गुल्सन झा र नन्दन यादवले समान १–१ विकेट लिए।
नेपालका लागि ऐरी र करणको योगदान
नेपालका उपकप्तान दीपेन्द्र सिंह ऐरीले ७५ रन (६७ बल, २ चौका, ३ छक्का) बनाएर टोलीलाई सम्मानजनक स्कोरमा पुर्याए।
ओपनर कुशल भुर्तेलले ४७ रन, भीम सार्कीले ४३, र कप्तान रोहित पौडेलले ३६ रनको योगदान दिए।
इन्निङ्सको अन्त्यतिर करण केसीले ४९ रनको महत्वपूर्ण इनिङ खेल्दै नेपाललाई २७० रन नजिक पुर्याए।
अमेरिकाका लागि हर्मित सिंहले ३ विकेट, सौरभ नेत्रवल्कर र नोस्तुस केन्जीगीले २–२ विकेट, र जसदीप सिंह तथा शुभम रञ्जनेले १–१ विकेट लिए।
लगातार तेस्रो
नेपालले यसअघि अमेरिकासँग पहिलो खेलमा १०६ रनले हार बेहोरेको थियो भने दोस्रो खेलमा यूएईसँग ५ विकेटले पराजित भएको थियो।
तेस्रो पराजयसँगै नेपालको स्थिति झन् कमजोर बनेको छ।
लिग २ को तालिकामा अमेरिका शीर्ष स्थानमा छ —
- २३ खेलमा १७ जित र ६ हारसहित ३४ अङ्क।
नेपाल भने १९ खेलबाट ५ जित, १२ हार र २ बराबरी सहित १२ अङ्कका साथ सातौँ स्थानमा रहेको छ।