मेची करिडोर अन्तर्गत इलामको पुवा खोलामा बेलिब्रिज निर्माण सम्पन्न भएसँगै इलाम सदरमुकामदेखि झापाको विर्तामोडसम्मको दूरी ३६ किलोमिटरले छोटिएको छ। अब यात्रुहरूलाई मेची राजमार्ग प्रयोग नगरी वैकल्पिक केचना–कञ्चनजङ्गा सडकमार्फत झापा पुग्न सम्भव भएको छ।
१३५ लाख लागतमा निर्माण
सडक डिभिजन कार्यालय इलामका अनुसार १३५ लाख रुपैयाँको लागतमा ४८.६ मिटर लामो बेलिब्रिज निर्माण गरिएको हो। निर्माण कार्य सागर/सुभारम्भ/एरिसा जेभीले गरेको हो।
बार्है महिना आवतजावत सहज
इलाम नगरपालिका–९ र ११ जोड्ने पुल नहुँदा हिउँदमा मात्र आवागमन सम्भव थियो, तर वर्षायाममा सडक पूर्णरूपमा बन्द हुने गथ्र्यो। बेलिब्रिज निर्माणपछि अब वर्षा र पहिरोको मौसममा पनि यात्रा सुरक्षित र सहज भएको वडाध्यक्ष गोपाल चहानले बताए।
“अब झापा–इलामको सवारी आवागमन बार्है महिना सहज हुने छ,” – वडाध्यक्ष चहान
विकल्पको रूपमा मेची करिडोर
यो पुलले मेची राजमार्गको विकल्पको रूपमा केचना–कञ्चनजङ्गा सडकलाई सक्षम बनाएको छ।
- पहिलेको दूरी (मेची राजमार्ग): ८३ किलोमिटर
- अबको दूरी (बेलिब्रिजमार्फत): ४७ किलोमिटर
दूरीमा ३६ किमी कटौती
विकास प्रगति
सडक डिभिजन प्रमुख ई. पवन भट्टराईका अनुसार केचना–कञ्चनजङ्गा सडकअन्तर्गत इलाम खण्डमा माई नगरपालिका क्षेत्रमा १५ किलोमिटर कालोपत्र भइसकेको छ। बाँकी १७ किलोमिटर खण्डमध्ये १४ किलोमिटरको ठेक्का प्रक्रिया अगाडि बढेको जनाइएको छ।