पूर्वराष्ट्रपति तथा नेकपा एमाले नेतृ विद्यादेवी भण्डारीले आगामी विधान महाधिवेशनमा आफू कसरी सहभागी हुने भन्ने विषयमा पार्टी केन्द्रीय कमिटीको निर्णयमा भर पर्ने बताएकी छन्।
मदन भण्डारी फाउन्डेसनले आयोजना गरेको पत्रकार भेटघाटमा बोल्दै भण्डारीले भने,
“विधान महाधिवेशनमा मेरो उपस्थिति आमन्त्रित प्रतिनिधिको रूपमा वा अन्य कुनै भूमिकामा हुनेछ भन्ने कुरा पार्टीको निर्णयमा भर पर्छ।”
उनले सक्रिय राजनीतिमा देशसेवाको उद्देश्यले पुनरागमन गरेको बताउँदै पार्टीको दर्शन र सिद्धान्तअनुसार अघि बढ्नुपर्ने धारणा राखिन्।
पार्टीमा भूमिकाबारे संकेत
भण्डारीले पार्टीभित्र आफ्नो भूमिकाबारे अहिले नै निश्चित नभएको तर केन्द्रीय नेतृत्वको निर्णयअनुसार जिम्मेवारी ग्रहण गर्ने बताइन्।
उनको भनाइ थियो,
“संस्थागत ढंगले अघि बढाउने पार्टी हो एमाले। व्यक्तिको होइन, विचार र नीति–दर्शनको पार्टी हो।”
संसद् विघटनबारे स्पष्टता
संसद् विघटनको चर्चामा पुनः आएपछि पूर्वराष्ट्रपतिले भनिन्,
“मन्त्रिपरिषद्को निर्णयअनुसार मैले त्यो कार्यान्वयन मात्र गरेकी हुँ। कुनै दबाब वा व्यक्तिगत स्वार्थबाट गरिएको होइन।”
उनले संवैधानिक प्रक्रिया बमोजिम नै संसद् विघटनका निर्णयमा हस्ताक्षर गरेको उल्लेख गरिन्।
मदन भण्डारीको सिद्धान्त र आजको एमाले
भण्डारीले जनताको बहुदलीय जनवाद (जबज) को चर्चा गर्दै भनिन् कि
“मदन भण्डारीले सिद्धान्तको बीज रोपे पनि उहाँको असमयिक निधनपछि त्यसलाई संस्थागत गर्न कठिन भयो। अब पार्टी त्यो बाटोमा अघि बढ्नुपर्छ।”
उनले पूर्वमा पनि नेकपाको सदस्यता नवीकरण गरिसकेको जानकारी दिइन्।