काठमाडौं विश्वविद्यालयको दीक्षान्त समारोह : १,१२९ विद्यार्थी दीक्षित, प्रधानमन्त्री ओलीद्वारा शुभकामना

काठमाडौं विश्वविद्यालयको ३०औं दीक्षान्त समारोहको दोस्रो चरणमा १,१२९ विद्यार्थीले उपाधि प्राप्त गरेका छन्। शुक्रबार धुलिखेलस्थित विश्वविद्यालयको केन्द्रीय परिसरमा आयोजित विशेष समारोहमा विद्यार्थीहरूलाई उपाधि प्रदान गरियो।

समारोहमा प्रधानमन्त्री तथा विश्वविद्यालयका कुलपति केपी शर्मा ओलीले उत्कृष्ट शैक्षिक नतिजा ल्याउने विद्यार्थीलाई स्वर्ण पदक वितरण गरे। उनले दीक्षित विद्यार्थीहरूलाई बधाई तथा शुभकामना दिँदै अध्ययनबाट प्राप्त ज्ञानलाई व्यवहारमा उतार्न आग्रह गरे।

“शिक्षा व्यवहारमा लागू गरेर देश र समाजको हितमा काम गर्नुपर्ने समय आएको छ,” ओलीले भने, “नवप्रवर्तन र सामाजिक परिवर्तनका क्षेत्रमा लाग्न सबै विद्यार्थी तयार हुनुपर्छ।”

व्यवहारिक शिक्षाको खाँचो : कुलपतिको जोड

समारोहमा बोल्दै उपकुलपति प्रा. अच्युत वाग्लेले विश्वविद्यालयले नेपालको उच्च शिक्षामा पुर्‍याएको योगदानलाई अझैसम्म राज्यले उचित मूल्यांकन नगरेको गुनासो गरे। उनले केयूले विदेशी पलायन रोकेर अनुसन्धान र नवप्रवर्तनमा ठुलो भूमिका खेलेको बताए।

“ग्रीन हाइड्रोजन उत्पादन, राष्ट्रिय उत्कृष्टता केन्द्र बनाउने योजना, र पूर्ण अंग्रेजी माध्यमको शिक्षालाई अझ सशक्त बनाउन राज्यको साथ आवश्यक छ,” वाग्लेले उल्लेख गरे।

नेतृत्वमा संवेदनशीलता आवश्यक : अन्तर्राष्ट्रिय अतिथि कार

समारोहका प्रमुख अतिथि ब्रेन्डन जी. कार (माउन्ट साइनाई हेल्थ सिस्टम्स, अमेरिका) ले नेतृत्वमा केवल प्राविधिक दक्षता मात्र नभई करुणा, संवेदनशीलता र सहानुभूतिको पनि ठूलो भूमिका हुने बताए।

“नेतृत्व भनेको निर्णय मात्र होइन, सेवा भाव र मानवताको सम्मान हो,” उनले भने।

६ स्कुलबाट दीक्षान्त, ११८ अन्तर्राष्ट्रिय विद्यार्थी

दोस्रो चरणको दीक्षान्त समारोहमा ६ वटा स्कुलबाट विद्यार्थीहरू दीक्षित भएका छन्। तीमध्ये महिला ५५४ र पुरुष ५७५ जना रहेका छन्। साथै, भुटान, भारत, श्रीलङ्का र माल्दिभ्सबाट ११८ जना अन्तर्राष्ट्रिय विद्यार्थीसमेत दीक्षित भएका छन्।

उपाधि प्राप्त गर्ने विद्यार्थीमध्ये ३२ जना पीएचडी/डीएम/एमसीएच तह, ६९ जना एमफिल, ५१३ जना स्नातकोत्तर, ४ जना पीजीडी, र ५११ जना स्नातक तहका विद्यार्थी छन्।