कतारको अल उदेद सैन्य अड्डामाथि इरानले मिसाइल हमला गरेको पुष्टि भएको छ। इरानी इस्लामिक रिभोलुसनरी गार्ड कोर्प्स (IRGC) ले यो हमला अमेरिकी अड्डाको जवाफस्वरूप गरिएको दाबी गरेको छ। इरानको सरकारी नजिकको तस्निम समाचार एजेन्सीले यस घटनालाई “विजयको घोषणा” को रूपमा चित्रण गरेको अल जजिरा ले उल्लेख गरेको छ।
इरानले यो मिसाइल हमला अमेरिकाले इरानी आणविक स्थलहरूमा सम्भावित आक्रमणको चेतावनीपछि प्रतिक्रिया स्वरूप गरेको जनाएको छ।
प्रत्यक्षदर्शीहरूका अनुसार, सोमबार राति कतारको राजधानी दोहा नजिकै आकाशमा ठूलो विस्फोट र ज्वालामुखी देखिएको थियो। सुरुवातमा यो आक्रमण इरानको थियो वा हवाई सुरक्षा प्रणालीको प्रतिक्रिया भन्ने कुरा स्पष्ट थिएन, तर पछि इरानले यो मिसाइल आक्रमण गरेको पुष्टि गर्यो।
कतारको आपतकालीन सुरक्षा प्रतिक्रिया
कतारस्थित अमेरिकी तथा बेलायती दूतावासहरूले आपतकालीन विज्ञप्ति जारी गर्दै आफ्ना नागरिकहरूलाई सुरक्षित स्थानमा रहन आग्रह गरेका छन्। कतार सरकारले तत्कालै देशको हवाई क्षेत्र अस्थायी रूपमा बन्द गर्दै आपतकालीन सुरक्षा योजना लागू गरेको छ।
अल उदेद बेसबारे जानकारी
अल उदेद एयर बेस मध्यपूर्वको सबैभन्दा ठूलो अमेरिकी सैन्य अड्डा हो, जुन सन् १९९६ मा स्थापना भएको थियो। २४ हेक्टरमा फैलिएको यो अड्डामा झण्डै १० हजार अमेरिकी सैनिक र करिब १०० युद्ध विमान तथा ड्रोन परिचालनमा रहेका छन्। यो अमेरिकी सेनाको सेंट्रल कमाण्ड (CENTCOM) को अग्र पंक्तिको मुख्यालय हो, जसबाट इराक, सिरिया र अफगानिस्तानका सैन्य रणनीति सञ्चालन हुन्छ।
क्षेत्रीय अस्थिरता र अन्तर्राष्ट्रिय प्रतिक्रिया
यस घटनाले अमेरिकी सैन्य स्थापनाको सुरक्षामाथि गम्भीर प्रश्न उठाएको विश्लेषकहरू बताउँछन्। अमेरिकी रक्षा मन्त्रालयले अझै आधिकारिक धारणा सार्वजनिक गरेको छैन।
कतारको प्रतिक्रिया
कतारको विदेश मन्त्रालयका प्रवक्ता माजेद अल अन्सारीले इरानी आक्रमणको निन्दा गर्दै यसले कतारको सार्वभौमसत्ता र अन्तर्राष्ट्रिय कानुनको उल्लंघन गरेको बताएका छन्। साथै, उक्त अड्डा पहिले नै खाली गरिएकाले कुनै मानवीय क्षति नभएको स्पष्ट पारिएको छ।