नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले नेपालमा अहिलेको मुख्य दुस्मन राजतन्त्र नभएको स्पष्ट पारेका छन्।
शनिबार काठमाडौंमा आयोजित एक कार्यक्रममा बोल्दै दाहालले भने, “नेपालमा सामन्ती निरङ्कुशतन्त्र र राजतन्त्र अहिलेको मुख्य चुनौती होइन। ती यदाकदा उठ्न खोजे पनि अब उठ्नेवाला छैन।”
उनका अनुसार अहिलेको मुख्य समस्या भनेको दलाल पुँजीवादी समूह, बिचौलिया र केही मुठ्ठीभर शक्तिकेन्द्र हुन्, जसले नेपालको अर्थतन्त्र र राजनीतिको नियन्त्रण लिएका छन्।
“नोकरशाही पुँजीवाद नै समृद्धिको बाधक”
अध्यक्ष दाहालले समृद्धिको यात्रामा ‘नोकरशाही पुँजीवाद’ मुख्य बाधक बनेको बताए। उनले अदालत, प्रशासन, र सम्पूर्ण राज्य संयन्त्रमा व्याप्त भ्रष्टाचार र विकृतिको गम्भीर आलोचना गरे।
“संघीय निजामती विधेयकमाथि भइरहेको चलखेल र छेडखानीले सम्पूर्ण सांसदहरू अपमानित भएका छन्। राज्यका सबै निकायमा विकृति छ,” उनले बताए।
सबै एक भएर भ्रष्टाचारविरुद्ध लड्नुपर्ने दाहालको आह्वान
दाहालले अबको मुख्य आवश्यकता भ्रष्टाचार, दलाल पुँजीवाद र नोकरशाही पुँजीवादविरुद्ध सबै एकजुट हुनु रहेको बताएका छन्।
उनले भने, “हामी सबैले अब संकल्प गर्नुपर्छ – भ्रष्टाचार र दलाल पुँजीवादका विरुद्ध लड्न। त्यसविना देशको समृद्धि सम्भव छैन।”