एमाले महासचिव शंकर पोखरेलले कालापानी, लिपुलेक र लिम्पियाधुराबारे भारत र चीनको कदमलाई गलत ठहर गरेका छन्। प्रेस चौतारी दाङद्वारा शनिबार बिहान घोराहीमा आयोजित पत्रकार सम्मेलनमा बोल्दै उनले नेपाललाई बेवास्ता गरी सीमामाथि बलमिच्याइँ गर्नु उचित नहुने बताएका छन्।
उनले सुगौली सन्धिलाई आधार मानेर नेपालको सीमा निर्धारण भएको भन्दै कालापानी, लिपुलेक र लिम्पियाधुरा नेपालकै भूभाग भएको दाबी गरे। पोखरेलका अनुसार, भारतले एकतर्फी रूपमा सीमामा दाबी सार्वजनिक गर्नु गलत हो र यस्तो विवाद केवल दुई पक्षीय वार्तामार्फत मात्र समाधान हुन सक्छ।
‘हामी वार्तामार्फत समस्या समाधान गर्न चाहन्छौं। प्रमाणका आधारमा आफ्नो भूमि स्पष्ट पार्न चाहन्छौं। एकतर्फी दाबी गरेर विवाद टुंगिँदैन,’ पोखरेलले भने।
त्यस्तै, उनले पूर्व राष्ट्रपति विद्यादेवी भण्डारीलाई राजनीतिक विवादमा नल्याउन सुझाव दिँदै माओवादी केन्द्रको पूर्व उपराष्ट्रपतिलाई राजनीतिमा ल्याउने निर्णय गलत भएको बताएका छन्।