दशैं–तिहार चाडपर्व नजिकिँदै जाँदा उपत्यका छाड्ने यात्रुको संख्या तीव्र रूपमा बढेको छ। नेपाल यातायात व्यवसायी राष्ट्रिय महासंघका अनुसार पछिल्लो तीन दिनमै करिब ४ लाख यात्रु काठमाडौं उपत्यका बाहिरिएका छन्।
यातायात व्यवस्था विभागले यात्रुहरूको सुरक्षित र सहज आवागमन सुनिश्चित गर्नका लागि विशेष तयारी गरेको जनाएको छ। मंगलबार विभागमा आयोजित सरोकारवालासँगको छलफलमा महानिर्देशक राजीव पोखरेलले चाडपर्वमा यातायात व्यवस्थापनलाई प्राथमिकताका साथ अघि बढाइने बताए।
विभागले गरेको तयारी:
- सुरक्षित यात्रा सुनिश्चित गर्न सुरक्षाकर्मी, यातायात व्यवसायी र विभागबीच सहकार्य।
- सडक अवरुद्ध हुन नदिन डोजर र उपकरण ठाउँ–ठाउँमा तयारी अवस्थामा राखिने।
- यात्रु ठगिने घटना रोक्न भाडा दर सार्वजनिक बोर्ड र सहायता कक्ष स्थापना।
यातायात व्यवसायीहरूको प्रतिबद्धता:
नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाका अनुसार गत वर्षको तुलनामा यस वर्ष यात्रुको चाप पहिले नै बढ्न थालेको छ। उनले सेवामा कुनै कमी हुन नदिन व्यवसायीहरू तयार रहेको जनाए।
त्यस्तै महासंघका अध्यक्ष विजयबहादुर स्वाँरले यो वर्ष अग्रिम टिकट प्रणाली भन्दा पनि सवारी साधनको उपलब्धताअनुसार टिकट काटिने बताए। उनले यात्रु सेवा सुनिश्चित गर्न प्रतिबद्धता जनाउँदै अहिलेको विषम परिस्थितिमा भाडा दर वृद्धि नहुने स्पष्ट पारे।