भाइटीकाको विशेष अवसरमा आज काठमाडौँको रानीपोखरी बीचमा रहेको बालगोपालेश्वर मन्दिर भक्तजनका लागि खुला गरिएको छ।
यो मन्दिर वर्षमा मात्र एक दिन — भाइटीकाको दिन खुल्ने परम्परा रहेको छ।
दिदी–बहिनी र दाजुभाइ नहुनेहरूले यस दिन बालगोपालेश्वर मन्दिरमा पूजा, दर्शन र टीका लगाउने चलन छ।
विश्वास छ — यहाँ पूजा गरी टीका लगाउनेहरूले भाइटीकाको पूर्ण पुण्य र आशीर्वाद प्राप्त गर्छन्।
आजको टीका साइत
नेपाल पञ्चाङ्ग निर्णायक विकास समितिका अनुसार आज भाइटीका लगाउन कुनै बाधा छैन।
तर साइत खोज्नेका लागि बिहान ११:३९ बजेको अभिजित् मुहूर्त उत्तम मानिएको छ।
समितिले चाहनेहरूले दिनभर टीका लगाउन सक्ने तर राज्य सञ्चालकहरूले भने साइतमै टीका लगाउनुपर्ने उल्लेख गरेको छ।
अन्य मन्दिरमा पनि विशेष पूजा
बालगोपालेश्वर मन्दिरसँगै आज जयवागेश्वरीस्थित खञ्जनेश्वर महादेव मन्दिरमा पनि दिदी–बहिनी र दाजुभाइ नहुनेहरूले पूजा र टीका लगाउने परम्परा रहेको छ।
रानीपोखरीमा बिहानैदेखि भक्तजनहरूको भीड देखिएको छ भने सुरक्षाकर्मीहरूले दर्शन व्यवस्थापनमा सहयोग गरिरहेका छन्।