ललितपुर महानगरपालिका–२२ खोइचामा बुधबार बिहान एक पुरुषको शव फेला परेको घटनाले स्थानीय क्षेत्र स्तब्ध बनेको छ। टाउको पछाडिको भागमा चोट लागेको र कानबाट रगत बगेको अवस्थामा शव भेटिएपछि प्रहरीले अनुसन्धान थालेको थियो।
नेपाल प्रहरीको केनाइन टोलीको सहयोगमा गरिएको प्रारम्भिक अनुसन्धानपछि मृतकको पहिचान दक्षिणकाली–९ का धनबहादुर तामाङका रूपमा गरिएको हो।
जिल्ला प्रहरी परिसर ललितपुरका प्रवक्ता डीएसपी चक्रराज जोशीका अनुसार तामाङको हत्या गरेको आरोपमा ८१ वर्षीय कान्छा पुतुवारलाई पक्राउ गरिएको छ। उनलाई बुधबार साँझ ललितपुर–२५ स्थित आफ्नै घरबाट नियन्त्रणमा लिइएको हो।
मृतकको शव पोस्टमार्टमका लागि पाटन अस्पताल पठाइएको प्रहरीले जनाएको छ।
हत्या पछाडिको कारण
प्रहरीका अनुसार, कान्छा पुतुवारको श्रीमतीसँग धनबहादुर तामाङको निकट सम्बन्ध भएको आशंकाका कारण घटनाको सुराकी फेला परेको हो। अनुसन्धानका क्रममा पुतुवारले केही वर्षअघि सडकमा बस्ने एक महिलालाई घरमा ल्याएर श्रीमतीका रूपमा राखेका थिए।
तर ती महिला मादक पदार्थ सेवन गर्ने र बेला–बेला हराउने गर्थिन्। श्रीमती घरमा हुँदा धनबहादुर तामाङ त्यहाँ आउने गरेको पाइएको छ।
मृतकको गोजीमा कान्छा पुतुवारकी श्रीमतीको फोटो समेत फेला परेको प्रहरीले जनाएको छ।
घटनाको विवरण
मंगलबार राति धनबहादुर तामाङ मादक पदार्थ सेवन गरेर कान्छाको घर पुगेका थिए। उनले “भैंसी बेचेर ल्याएको १५ हजार रुपैयाँ माग्न आएको” बताएका थिए।
त्यही क्रममा विवाद बढेपछि कान्छा पुतुवार रिसको आवेगमा तामाङलाई धकेल्दा बिजुलीको पोलमा टाउको ठोकिएर गम्भीर घाइते भई बेहोस भएका थिए। त्यसपछि कान्छाले तामाङलाई खोल्सातर्फ घिसार्दै बाँसघारीमा फालेको बयान दिएका छन्।
प्रहरीले थप अनुसन्धान अघि बढाएको छ।