अमेरिका राष्ट्रपति Donald Trumpले इरानमाथि गरिएको सैन्य आक्रमणको आलोचना गर्ने डेमोक्रेट नेताहरूको कडा आलोचना गरेका छन्। उनले विपक्षी दलले राजनीतिक स्वार्थका कारण मात्र अभियानको विरोध गरिरहेको आरोप लगाएका हुन्।
ट्रम्पले आफ्नै सामाजिक सञ्जाल प्लेटफर्म Truth Socialमार्फत प्रतिक्रिया दिँदै डेमोक्रेटहरूलाई “उग्र वामपन्थी” भन्दै आक्रमणको आवश्यकता र महत्वबारे जोड दिएका छन्। उनले अमेरिका र इजरायलले इरानमा गरेको कदमलाई “अत्यन्त आवश्यक र महत्वपूर्ण” निर्णय भएको दाबी गरेका छन्।
उनले लेखेका छन्, “पूर्ण रूपमा बाटो बिराएको पार्टीले केवल मैले गरेको हुनाले गुनासो गरिरहेको छ। यदि मैले यस्तो नगरेको भए उनीहरू नै किन आक्रमण नगरेको भन्दै आलोचना गर्थे।”
राष्ट्रपतिले विपक्षीहरूलाई कडा शब्दमा आलोचना गर्दै आफूले जे निर्णय गरे पनि उनीहरू त्यसको उल्टो पक्षमा उभिने दाबी गरेका छन्। ट्रम्पका अनुसार हालको कदमले अमेरिकालाई पहिलेभन्दा अझ बलियो बनाएको छ।
यसैबीच, इरानका सर्वोच्च नेता Ali Khameneiको ज्यान जाने गरी अमेरिका र इजरायलले गरेको आक्रमणपछि ट्रम्प ह्वाइट हाउस फर्किएका थिए। उनले अमेरिकाले इरानको “धज्जी उडाइरहेको” दाबी गर्दै आगामी दिनमा अझ ठूलो कदम चालिन सक्ने संकेत गरेका छन्।
मध्यपूर्वमा बढ्दो तनावका बीच ट्रम्पको यो अभिव्यक्तिले अमेरिकी आन्तरिक राजनीतिमा समेत नयाँ बहस सुरु भएको विश्लेषण गरिएको छ।