नेपाल राष्ट्र बैंकले यस वर्ष दशैं–तिहारका लागि नयाँ नोट सटही सुविधा प्रदान नगर्ने भएको छ। खर्च व्यवस्थापनका कारण राष्ट्र बैंकले नयाँ नोटको वितरण रोकेर बजारबाट संकलित र कम प्रयोग भएका (सुकिला) नोट मात्र उपलब्ध गराउने निर्णय गरेको हो।
मुद्रा व्यवस्थापन विभागका अनुसार भदौ २९ गतेदेखि असोज १० गतेसम्म सर्वसाधारण, संघ/संस्था र वित्तीय संस्थाहरूमार्फत सुकिला नोट सटही सुविधा दिइनेछ। थापाथलीस्थित मुख्य कार्यालयसहित विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीका प्रदेश कार्यालय तथा इजाजत प्राप्त “क”, “ख” र “ग” वर्गका बैंक तथा वित्तीय संस्थाहरूले उक्त सेवा उपलब्ध गराउनेछन्।
विगतमा ५, १०, २०, ५० र १०० दरका नयाँ नोट सटही हुने प्रचलन थियो। तर चाडपर्वमा छिट्टै बिग्रने र छाप्ने खर्च उच्च हुने कारण राष्ट्र बैंकले गत वर्षदेखि नयाँ नोट वितरण बन्द गरेको हो।