धनुषा जिल्लाको भारतसँग सटेको सीमावर्ती क्षेत्रमा सशस्त्र प्रहरीले ४ राउण्ड गोली चलाएको छ।
बिदेह नगरपालिका–२, दुहबीस्थित आँप बगैंचामा सशस्त्र प्रहरीको टोलीले भारतबाट नेपालतर्फ ल्याइँदै गरेको अवैध सामान बरामद गर्ने क्रममा उत्पन्न तनावपछि गोली चलाएको हो।
सशस्त्र प्रहरी बल सीमा सुरक्षा गुल्म, महिनाथपुरबाट खटिएको टोलीले अवैध तस्करी नियन्त्रणका लागि निगरानी गर्दै गर्दा विवाद उत्पन्न भएको हो। प्रहरी स्रोतका अनुसार, अवैध सामग्रीसहित नेपाल प्रवेश गर्ने क्रममा स्थानीय केही व्यक्तिहरूले विरोध जनाउँदै ढुंगा मुढा गरेका थिए। उक्त अवस्थाबाट आत्मरक्षा गर्नुपर्ने स्थिति आएपछि प्रहरीले ४ राउण्ड गोली चलाएको जानकारी दिइएको छ।
तीन जना घाइते, एक सशस्त्र प्रहरी पनि समावेश
झडपका क्रममा एक सशस्त्र प्रहरीसहित तीन जना घाइते भएका छन्। घाइतेहरूलाई उपचारका लागि नजिकैको स्वास्थ्य संस्थामा लगिएको प्रहरीले जनाएको छ।
प्रहरी स्रोतका अनुसार, सीमावर्ती क्षेत्रमा तस्करी रोक्न सुरक्षाकर्मीहरू नियमित गस्तीमा खटिँदै आएका छन्। तर अवैध कारोबारी र केही स्थानीयको सहयोगमा बारम्बार अवरोध सिर्जना हुने गरेको र यसपटक स्थिति नियन्त्रण बाहिर जाँदा गोली चलाउनुपरेको बताइएको छ।
सुरक्षा व्यवस्था कडा
घटनापछि सीमावर्ती क्षेत्रमा थप सुरक्षाकर्मी परिचालन गरिएको छ। स्थिति अहिले नियन्त्रणमा रहेको जनाइएको छ भने घटनाको थप अनुसन्धान जारी रहेको सशस्त्र प्रहरीले जनाएको छ।