नेपाल सरकारले भारत सरकारसँग सरकार–सरकार (जीटुजी) सम्झौताबाट खरिद गरेको युरिया मल वीरगन्ज हुँदै नेपाल भित्रिन थालेको छ ।
भारतको कोलकाता बन्दरगाहबाट २ हजार ५ सय टन मल बोकेर आएको पहिलो खेप मंगलबार रक्सौल रेलवे स्टेशन आइपुगेको हो । त्यसपछि बुधबारदेखि ट्रकमार्फत वीरगन्जस्थित कृषि सामग्री कम्पनीको प्रादेशिक कार्यालयको गोदाममा मल भित्र्याउन थालिएको छ ।
कम्पनीका वीरगन्ज प्रादेशिक कार्यालय प्रमुख दुर्गाप्रसाद पाण्डेका अनुसार, बुधबार दिउँसोसम्म २५ ट्रक युरिया गोदाममा भण्डारण भइसकेको छ । उनले भने, “रक्सौल र सिर्सिया सुक्खा बन्दरगाह हुँदै अब मल निरन्तर भित्रिन्छ ।”
भारत सरकारले आदित्य बिरला कम्पनीलाई मल आपूर्ति ठेक्का दिएको थियो, जसले तेस्रो मुलुकबाट मल ल्याएको हो । नेपाल सरकारले बर्खे धान बाली सिजनलाई ध्यानमा राखेर यो मल खरिद गरेको हो ।
३० हजार टन जीटुजी युरिया वितरण योजना:
- मधेश प्रादेशिक कार्यालय: ११ हजार ५ सय टन
- भैरहवा प्रादेशिक कार्यालय: १० हजार टन
- विराटनगर प्रादेशिक कार्यालय: ८ हजार ५ सय टन
पाण्डेले भने, “रोपाइँको मुख्य सिजनमै मल भित्रिएकाले यो वर्ष आन्तरिक व्यवस्थापनमा समस्या नहुनेछ ।”
साउन पहिलो साता भित्रिने डीएपी मल
कम्पनीले आयात गरेको अर्को खेप अन्तर्गत डीएपी मल पनि साउनको पहिलो साता भित्रिन सक्ने सम्भावना रहेको पाण्डेले जानकारी दिए । यसले किसानहरूलाई समयमा मल आपूर्ति गर्न सहज हुने उनको भनाइ छ ।