अन्तर्राष्ट्रिय बजारमा मूल्य बढेसँगै नेपालमा सुनको मूल्य फेरि नयाँ रेकर्डमा पुगेको छ। नेपाल सुनचाँदी व्यवसायी महासंघका अनुसार शुक्रबार (साउन २३) प्रतितोला सुनको मूल्य १ लाख ९९ हजार ४ सय रुपैयाँ पुगेको छ, जुन अहिलेसम्मकै उच्च हो।
गत साता (साउन १६) को तुलनामा प्रतितोला रु. ६,३०० ले मूल्य बढेको हो। अन्तर्राष्ट्रिय बजारमा प्रतिऔंस सुनको मूल्य ३२९३ अमेरिकी डलरबाट बढेर ३३९७ डलर पुगेको छ। गहनाविज्ञ तेजरत्न शाक्यका अनुसार अमेरिकी राष्ट्रपति डोनाल्ड ट्रम्पको भन्सार नीतिले विश्व आपूर्ति प्रणालीमा असर पारेको र बैंक अफ युकेले ब्याजदर घटाएको कारण लगानीकर्ता सुनमा आकर्षित भएका छन्।
विनिमय दरमा भएको वृद्धिले पनि मूल्यमा प्रत्यक्ष प्रभाव पारेको छ। अहिले १ अमेरिकी डलर बराबर १४० रुपैयाँ पर्छ। यसका अतिरिक्त, व्यवसायीले ज्याला–जर्ती जोड्दा गहनाको मूल्य अझै बढ्नेछ — प्रतितोला करिब २ लाख २३ हजार रुपैयाँ पर्छ।
सरकारले साउन १ देखि सुन तथा बहुमूल्य गहनामा २ प्रतिशत विलासिता कर लागू गरेको छ। यद्यपि, हाल तोकिएको मूल्यमा यो कर समावेश गरिएको छैन। कार्यदलको प्रतिवेदन आएपछि मात्र मूल्यमा कर थपिने महासंघले जनाएको छ।
यसैबीच, चाँदीको मूल्य पनि बढेको छ। साउन १६ मा प्रतितोला रु. २,२३५ मा कारोबार भएको चाँदी साउन २३ मा बढेर रु. २,३२५ पुगेको छ।
एक साताको सुन मूल्य (प्रतितोला)
- साउन १६ — रु. १,९३,१००
- साउन १८ — रु. १,९६,५००
- साउन १९ — रु. १,९६,६००
- साउन २० — रु. १,९८,५००
- साउन २१ — रु. १,९८,४००
- साउन २२ — रु. १,९८,४००
- साउन २३ — रु. १,९९,४०० (रेकर्ड उच्च)