नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले गृहमन्त्री रमेश लेखकको राजीनामा भिजिट भिसा प्रकरणमा मुख्य विषय नभएको स्पष्ट पारेका छन्।
प्रतिनिधिसभामा प्रमुख प्रतिपक्ष दलहरूले निरन्तर अवरोध गरिरहेका सन्दर्भमा दाहालले भिजिट भिसा प्रकरण र त्रिभुवन अन्तर्राष्ट्रिय विमानस्थलको अध्यागमन शाखामा देखिएका बेथिति नै छानबिनको मुख्य विषय भएको बताए।
दाहालले बिहीबार सत्तापक्ष र प्रतिपक्षबीच भएको छलफलपछि भने, “गृहमन्त्रीको राजीनामा भन्दा पनि अध्यागमनमा देखिएका बेथिति र भिजिट भिसा प्रकरणमा गम्भीर अध्ययन तथा छानबिन गर्नु नै अहिलेको मुख्य आवश्यकता हो।”
उनका अनुसार सत्तापक्ष र प्रतिपक्षबीच उक्त विषयमा लिखित सहमति जुटाउने प्रक्रिया सुरु भइसकेको छ। “छलफलको क्रममा हामी छानबिनबिना प्रतिपक्ष संसद् चलाउने अवस्थामा नरहेको स्पष्ट गरेका छौं,” दाहालले थपे।
सार्वजनिक चासोको विषय बनेको अध्यागमन समस्यालाई सत्तापक्ष र प्रतिपक्ष दुवैले गम्भीरतापूर्वक लिनुपर्ने धारणा राख्दै दाहालले विगतदेखि नै देखिएको बेथिति अब ठोस संरचना बनाएर छानबिन गर्नुपर्ने बताए।
राष्ट्रिय स्वतन्त्र पार्टी (रास्वपा)ले सो प्रस्तावमा थप छलफलको समय माग गरेपछि बिहीबारको प्रतिनिधिसभा बैठक अगाडि बढ्न सकेन। रास्वपाले सत्तापक्षसँग पनि थप छलफलको आवश्यकता रहेको बताएकोले सहमति शुक्रबारसम्म टुंगो लाग्ने बताइएको छ।