नेपाली कांग्रेसका सभापति तथा पूर्वप्रधानमन्त्री शेरबहादुर देउवाले नेपालमा स्वदेशी र विदेशी लगानीकर्ताले ढुक्कसँग लगानी गर्न सक्ने वातावरण निर्माण गर्नुपर्ने आवश्यकता औंल्याएका छन्।
मंगलबार काठमाडौंमा आयोजित इप्पानको २३औँ वार्षिक साधारणसभालाई सम्बोधन गर्दै देउवाले लगानीकर्तालाई सहजता दिने कार्यलाई सरकारले अग्राधिकार दिनुपर्ने बताए। उनका अनुसार सरकार लगानीकर्तालाई दुःख दिने मानसिकता राख्नै नहुने स्पष्ट गरे।
सरकारको जिम्मेवारी : विद्युतको खपत र व्यापार
देउवाले उत्पादन भएको विद्युतको उपभोग र निर्यात गर्ने जिम्मा सरकारको भएको बताउँदै निजी क्षेत्रको सहकार्यमा मात्र ऊर्जा व्यवस्थापन सहज हुने धारणा राखे। उनले जलविद्युत् आयोजनाहरूको IPO निष्कासन रोकिनु गलत भएको भन्दै धितोपत्र बोर्डले चाँडै सेयर निष्कासन मार्ग खुलाउने विश्वास व्यक्त गरे।
उनले भने,
“विद्युतको खपत र व्यापार सरकारको जिम्मेवारी हो, तर त्यसमा निजी क्षेत्रको सहभागिता आवश्यक छ। लगानीकर्ताले विश्वास गर्ने वातावरण बनाउनु नै सरकारको प्राथमिकता हुनु पर्छ।“
ऊर्जा स्रोत नेपालको प्राकृतिक सम्पत्ति
सभापति देउवाले नेपाललाई प्राप्त भएको ऊर्जा स्रोतलाई प्रकृतिको उपहार भन्दै त्यसको उचित सदुपयोगमा जोड दिए। उनले ‘ग्रिन इनर्जी’ (हरित ऊर्जा) मा लगानी बढाउनु आवश्यक रहेको र विश्व प्रवृत्तिअनुसार नेपालले पनि वातावरणमैत्री ऊर्जा उत्पादनमा अगाडि बढ्नुपर्ने विचार राखे।
निजीकरण र उदारवादले दिएको उपलब्धि
देउवाले नेपालको हालको आर्थिक र सामाजिक प्रगति निजीकरण र उदार अर्थनीतिले सम्भव भएको बताए। यद्यपि कार्यान्वयनमा भएका कमजोरीहरूलाई हटाएर निजी क्षेत्रलाई थप प्रोत्साहन दिनुपर्ने धारणा व्यक्त गरे।
“आज नेपालमा लोडसेडिङको अन्त्य हुनु निजी क्षेत्रको योगदानले सम्भव भएको हो,” देउवाले भने।