इजरायली रक्षा बल (आईडीएफ) ले गाजा शहरबाट अस्थायी रूपमा खोलिएको निकास मार्ग बन्द गरेको छ।
यसअघि गाजा क्षेत्रका नागरिकलाई बाहिर निस्कन आदेश दिइएको भए पनि बुधबारदेखि सलाह अल–दिन स्ट्रिटमार्ग नागरिक आवत–जावतका लागि उपलब्ध नरहेको आईडीएफका प्रवक्ता अविचाय अद्राईले जनाएका छन्।
उनका अनुसार अब मानिसहरूलाई बाहिर निस्कन अनुमति पाउने एक मात्र सडक अल–रशिद स्ट्रिट हुनेछ।
गाजाको मुख्य उत्तर–दक्षिण जोड्ने सडक सलाह अल–दिनलाई इजरायलले पुनः सैन्य क्षेत्र घोषणा गरेको छ। यो क्षेत्रलाई नेत्जारिम करिडोर भनिन्छ। यस करिडोरलाई यस वर्षको सुरुवातमा भएको युद्धविराम सम्झौताअनुसार खाली गरिएको थियो।
हालै इजरायलले स्थल आक्रमण तीव्र पारेसँगै निकासी मार्ग बन्द भएको हो। अस्थायी निकासीका लागि खोलिएको सडक नेत्जारिम हुँदै जान्थ्यो तर अहिलेबाट पूर्ण रूपमा बन्द गरिएको छ।