रुकुमपूर्वको सिस्ने गाउँपालिका–५ मा अवस्थित कमलदह पछिल्ला वर्षहरूमा पर्यटकहरूको पहिलो रोजाइ बन्दै गएको छ। सदरमुकाम नजिकै रहेको यो मनमोहक दहमा अहिले आन्तरिक र बाह्य पर्यटकहरूको चहलपहल बढ्दो छ।
सूर्योदयका सुनिला किरणसँगै कमलको फुलले ढाकिएको दह, हरियाली बनको शान्त वातावरण र पानीमा परावर्तित हिमाली दृश्य हेर्नका लागि दैनिकजसो सर्वसाधारणदेखि सरकारी कर्मचारीसम्म यहाँ आउने गरेका छन्।
पर्यटकहरू यहाँ बिहानको हिँडाइ, फोटोग्राफी, भिडियो निर्माण, ध्यान, योग र पारिवारिक घुमघामका लागि आउने गर्छन्। कार्यालय खुल्नुअघि र बन्द भएपछि कमलदहमा झनै चहलपहल बढ्ने गरेको छ।
प्राकृतिक सौन्दर्यसँगै रोजगारीको अवसर
कमलदहमा दैनिक ४–५ जना युवाले फोटो र भिडियो खिचेर रोजगारी पाएका छन्। यसले स्थानीय युवामा स्वदेशमै अवसर खोज्ने प्रेरणा जगाएको छ।
नेपाल पत्रकार महासंघ रुकुमपूर्वका अध्यक्ष वसन्त बाँठा मगरका अनुसार, “यदि स्थानीय सरकारले दहको संरक्षण, सफाइ र पूर्वाधार व्यवस्थापनमा निरन्तर ध्यान दियो भने, कमलदहले जिल्लाको अर्थतन्त्रमा ठूलो योगदान पुर्याउने सम्भावना छ।”
रुकुमपूर्वको पर्यटन गन्तव्यका रूपमा उदाउँदो
स्थानीयहरूको सक्रियता र गाउँपालिकाको पहलसँगै कमलदह अहिले रुकुमपूर्वको प्राकृतिक गहनाको रूपमा चिनिन थालेको छ। प्रचार–प्रसार र व्यवस्थापन बढेमा यस क्षेत्रले निकट भविष्यमै रुकुमपूर्वको प्रमुख पर्यटन गन्तव्यका रूपमा पहिचान पाउने विश्वास कमलदहमा फोटो खिच्दै आएका रमेश सुनारले व्यक्त गरे।