धेरै जनप्रतिनिधिहरू भ्रष्टाचार र घुसजस्ता आरोपमा आलोचित भइरहेका बेला खोटाङका वडाध्यक्ष जेफर राईले राजनीति र कृषि दुवैमा अनुकरणीय उदाहरण प्रस्तुत गरेका छन्।
खोटेहाङ गाउँपालिका–३ का स्थायी बासिन्दा जेफर, १२५ रोपनी जग्गामा अलैंची खेती गर्दै आएका छन्। यस वर्ष मात्र उनले करिब ५० रोपनी जग्गाबाट ४० मन अलैंची उत्पादन गरेका थिए। प्रतिमन ९२ हजार रुपैयाँको दरले बिक्री गरेपछि उनको कुल आम्दानी ३६ लाख ८० हजार रुपैयाँ पुगेको छ।
जेफरको अलैंची खेती उनको पारिवारिक पेसा हो। उनका बुवा भरतजङ राईले करिब ३० वर्षअघि सुरु गरेको खेतीलाई जेफरले व्यावसायिक रूपमा विस्तार गरेका छन्। खेतीको हेरचाहका लागि दुई स्थानीय युवालाई रोजगार पनि दिइएको छ। जेफर भन्छन्, “अलैंचीले हामीलाई आत्मनिर्भर बनाएको छ। कृषिमा लगानी गर्न सकियो भने गाउँ र देश दुवैको मुहार फेरिन्छ।”
स्थानीय शिक्षक देवराज सापकोटाका अनुसार, जेफरको मिहिनेतले गाउँमा कृषिको वातावरण परिवर्तन गरेको छ। वडाध्यक्षको रूपमा उनले सडक, खानेपानी, सिँचाइ र विद्यालय सुधारमा पनि सक्रिय भूमिका खेलेका छन्।
अजय बस्नेत, उद्योग वाणिज्य संघ खोटाङका महासचिव, भन्छन्, “जेफर जस्ता कृषक जनप्रतिनिधिहरूले गाउँमा रोजगार सिर्जना गर्दै स्थानीय अर्थतन्त्र बलियो बनाइरहेका छन्।”
जेफरको भनाइ छ, “जनताको भरोसा जित्न भ्रष्टाचार र स्वार्थभन्दा माथि उठ्नुपर्छ। जनप्रतिनिधि बन्नु भनेको जनताको सेवक बन्नु हो। राजनीति इमानदार हुन सक्छ, यदि जनताको श्रम र पसिनाको मूल्य बुझ्न सकिन्छ भने।”
खोटाङ मात्र नभई देशका अन्य जनप्रतिनिधिहरूका लागि जेफर प्रेरणाको स्रोत बनेको स्थानीयहरूले बताए।