बंगालको खाडीबाट उत्पन्न ‘मोन्था’ आँधीको प्रभाव क्रमशः कमजोर हुँदै गएको छ। तर अझै पनि देशका केही पहाडी र हिमाली क्षेत्रमा हल्का वर्षा र हिमपातको सम्भावना रहेको जल तथा मौसम विज्ञान विभागले जनाएको छ।
विभागका अनुसार आज देशका अधिकांश भूभागमा मौसम सामान्यतया सफा रहने भए पनि कोशी, बागमती र गण्डकी प्रदेशका पहाडी भूभागमा हल्का वर्षा हुन सक्छ।
अरब सागरमा बनेको न्यून चापीय प्रणाली र पश्चिमी वायुको प्रभावले केही स्थानमा बदली देखिएको भए पनि, मधेस प्रदेशलगायत देशका अन्य भूभागमा मौसम सफा रहनेछ।
आज दिउँसो कोशी, बागमती र गण्डकी प्रदेशमा साधारण बदली रहन सक्ने र बाँकी प्रदेशमा मौसम सफा रहने अनुमान गरिएको छ। त्यस्तै राति पनि यी प्रदेशका पहाडी तथा हिमाली भूभागमा आंशिक बदली रहने र एक-दुई स्थानमा हल्का वर्षा तथा हिमपातको सम्भावना विभागले उल्लेख गरेको छ।
मौसम पूर्वानुमान मुख्य बिन्दुहरू:
- कोशी, बागमती र गण्डकी प्रदेशका पहाडी भूभागमा हल्का वर्षा
- हिमाली क्षेत्रका केही स्थानमा हल्का हिमपात
- मधेस, लुम्बिनी, कर्णाली र सुदूरपश्चिम प्रदेशमा मौसम सामान्यतया सफा