बडादशैंको रौनक सकिएसँगै गाउँघरमा कामको चटारो बढेको छ। कृषकहरूलाई धान भित्र्याउन हतारो छ भने अन्य किसान हिउँदका लागि खर काट्ने, अन्नबाली भित्र्याउने र खेतबारी व्यवस्थित गर्ने कार्यमा व्यस्त देखिएका छन्।
सुदूरपश्चिमका पहाडी जिल्ला तथा ग्रामीण भेगमा असार सकिएपछि स्थानीयहरू फुर्सदिला हुने गरेका थिए, तर भदौदेखि धान, कोदो, दलहन, भटमास, मास, राजमा, सिमी, तिल लगायत बाली भित्र्याउने चटारो सुरु भएको छ।
स्थानीयहरूको भनाइ अनुसार सडक पहुँच पुगे पनि नियमित गाडी नचल्दा भारी बोकेर उकालो ओरालो हिँड्नु पर्ने बाध्यता छ। गन्यापधुरा–२ कि महेश्वरी मल्लले सुदूरका मौलिक चाडबाडले जनजीवन झनै कष्टकर बनाएको बताइन्।
विशेषगरी महिलाहरूको काम व्यस्त छ। अजयमेरु–२ कि लक्ष्मी भण्डारीका अनुसार पुरुषहरू घरायसी काममा बढी सक्रिय नहुँदा महिलाले अन्नबाली भित्र्याउने, गोठमा मल हाल्ने, आलु र तरकारी रोप्ने लगायतका सबै काम हातमा लिनुपरेको छ।
अमरगढी–७ कि लक्ष्मी भट्टराईले बताइन्, “धान र कोदो भित्र्याउने, गाईभैंसीका लागि हरियो घाँस काटेर सुकाउने काम महिलाको भ्याइनभ्याइ भएको छ। घरायसी कामदेखि अन्नबाली र गोठ व्यवस्थापन सबै एउटै समयमा गर्नुपर्ने बाध्यता छ।”
कृषकहरूले बताए अनुसार धान काट्ने र बारी व्यवस्थापनमा व्यस्त हुने यो समय सुदूरपश्चिमका ग्रामीण भेगमा महिलाहरूको प्रमुख श्रम रहन्छ भने पुरुषहरू खनजोत र घरायसी काममा व्यस्त रहेका छन्।