नेपाल र भारतबीच आर्थिक सहकार्यलाई थप मजबुत बनाउने उद्देश्यले नेपाल–भारत चेम्बर अफ कमर्स एन्ड इन्डस्ट्री (निक्की) र फेडेरेसन अफ इन्डियन चेम्बर अफ कमर्स एन्ड इन्डस्ट्री (फिक्की) बीच महत्वपूर्ण समझदारी भएको छ।
नयाँदिल्लीमा आयोजित कार्यक्रममा निक्कीका अध्यक्ष सुनील केसी र फिक्कीकी महाप्रबन्धक ज्योति बिजले सम्झौतापत्रमा हस्ताक्षर गरेका हुन्। यो समझदारीले दुई देशबीचको आपसी व्यापार, लगानी, र सीमापार सहकार्यलाई थप संस्थागत बनाउने लक्ष्य लिएको छ।
समझदारीअनुसार अब दुवै संस्था व्यापारिक प्रतिनिधिमण्डलको आदानप्रदान, संयुक्त प्रवर्द्धनात्मक कार्यक्रम आयोजना, गैरगोप्य जानकारीको साझेदारी र संयुक्त बजार अध्ययनमा सहकार्य गर्नेछन्।
निक्कीले नेपालका लागि फिक्कीको विशेष साझेदारको भूमिका निभाउनेछ भने फिक्कीले भारतका लागि निक्कीलाई विशेष साझेदारको रूपमा मान्यता दिनेछ। साथै, दुवै पक्षले व्यापार तथा लगानीसम्बन्धी तथ्यांक र अध्ययन प्रतिवेदन पनि नियमित रूपमा साटासाट गर्नेछन्।
निक्कीका अध्यक्ष केसीले भने, “हामी प्रत्येक वर्ष कम्तीमा एउटा प्रमुख संयुक्त कार्यक्रम सञ्चालन गर्नेछौं। बजार अध्ययन, आर्थिक विकासका नयाँ क्षेत्र पहिचान, र संयुक्त अध्ययनमा समेत सहकार्य हुनेछ।”
फिक्कीकी महानिर्देशक बिजले पनि आर्थिक सम्बन्धलाई सुदृढ बनाउने जिम्मेवारी दुवै संस्थाको रहेको बताउँदै भारत र नेपालको आर्थिक साझेदारीलाई अझ सशक्त बनाउने प्रतिबद्धता व्यक्त गरिन्।
फिक्कीमा हाल सार्वजनिक तथा निजी क्षेत्रका २ लाख ५० हजारभन्दा बढी कम्पनी आबद्ध छन्। यो संस्था भारतको नीति निर्माणदेखि आर्थिक वृद्धि र लगानी प्रवर्द्धनसम्मका क्षेत्रमा अग्रसर रहँदै आएको छ।
समझदारीले दुई देशबीचको लामो समयदेखिको आर्थिक अन्तरनिर्भरतालाई औपचारिकता दिएको छ। दुवै पक्षले सीमापार व्यापारका चुनौती समाधान गर्न र नयाँ सम्भावनाहरूको खोजीमा मिलेर काम गर्ने जनाएका छन्।
सम्झौताअनुसार अब दुवै संस्था नेपाल र भारतका अतिरिक्त बीबीआईएन (BBIN) तथा बिमस्टेक (BIMSTEC) देशहरूसँग पनि सहकार्य गर्ने छन्। “हामी अब ट्र्याक १.५ संवाद प्रारम्भ गर्दैछौं जसमा दुवै देशका सरकारी प्रतिनिधिहरूको समेत सहभागिता रहनेछ,” केसीले जानकारी दिए।