सत्तारूढ नेपाली कांग्रेसका नेता शेखर कोइरालाले उपसभामुख इन्दिरा रानालाई पदबाट हटाउने प्रयासलाई “नेताहरूको अपरिपक्क निर्णय” भन्दै असहमति जनाएका छन्।
सत्तारूढ कांग्रेस र एमालेले पुरानो अमेरिकी भिसा प्रकरणलाई आधार बनाएर उपसभामुखलाई हटाउने तयारी गरेको चर्चा भइरहेका बेला कांग्रेसभित्रै मतभेद देखिएको हो।
कोइरालाले आफू उक्त प्रक्रियामा सहभागी नभएको र परामर्श समेत नगरिएको बताएका छन्। उनका अनुसार, पदअनुकूल आचरण नगरेको आरोपमा पुरानो घटना कोट्याएर उपसभामुखलाई हटाउने प्रयास असफल भएको हो।
कोइरालाको असहमति
कोइरालाले मंगलबार दर्ता गर्न लागेको प्रस्तावमा आफूले समर्थन नगरेको स्पष्ट पारेका छन्। उनले भने, “यो काम गर्न नहुने कुरा हो, नेताहरूले जनताको असन्तुष्टिमा घिउ थप्ने काम गरेका छन्।”
उनको भनाइमा, आम नागरिकको चाहना र प्राथमिकता एकातिर छ भने नेताहरू त्यसको बेवास्ता गर्दै राजनीतिक स्वार्थमा अल्झिएका छन्।
सांसदहरूको हस्ताक्षरबारे
उनले आफ्ना पक्षका सांसदलाई हस्ताक्षर नगर्न आग्रह गरेको भन्ने आरोप अस्वीकार गर्दै सबैलाई स्वतन्त्र निर्णय गर्ने छुट दिएको बताए। “मैले कसैलाई रोक्ने काम गरेको छैन,” उनले स्पष्ट पारे।
भिसा प्रकरण र संवैधानिक परिषद् विवाद
उपसभामुखलाई हटाउने निर्णय भिसा प्रकरणसँग जोडिएको भए पनि यसअघि पनि यस्ता धेरै घटनाहरू भएको भन्दै कोइरालाले प्रश्न उठाएका छन्। साथै, संवैधानिक परिषद्मा कांग्रेसको सदस्य नभएको कारण अहिले मात्र मुद्दा उठाइएको हो कि भन्ने आशंका पनि उनले व्यक्त गरे।
अपरिपक्क निर्णयको आलोचना
उनले यसअघि पूर्व प्रधानन्यायाधीश सुशीला कार्की र चोलेन्द्र शमशेर जबराविरुद्ध महाअभियोग लगाएर पनि असफल भएको उदाहरण दिँदै नेताहरू प्रायः अपरिपक्क निर्णय गर्ने गरेको आरोप लगाए।
कोइरालाले भने, “नेताहरूले आफ्ना प्रतिकूलतालाई महाअभियोग वा पदमुक्त गर्ने अस्त्र बनाउन थालेका छन्, यसले दललाई कमजोर बनाउने मात्र काम गर्छ।”
उनका अनुसार, यस प्रकारका कदमले आम जनतालाई निराश बनाउने मात्र नभई पार्टीको छवि कमजोर पार्ने खतरा पनि बढाउँछ।