नेपाल राष्ट्र बैंकले बडादशैंका लागि आवश्यक पर्ने सुकिला नोट साट्ने प्रक्रिया सुरु गरेको छ। आइतबारदेखि देशभरका बैंक तथा वित्तीय संस्थाहरूले सर्वसाधारण र संघ/संस्थालाई नोट साट्ने व्यवस्था गरेका छन्।
राष्ट्र बैंकको मुद्रा व्यवस्थापन विभागका अनुसार थापाथलीस्थित मुख्य कार्यालयसँगै प्रदेश कार्यालयहरू विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीबाट पनि सटही गर्न सकिनेछ।
इजाजत प्राप्त क, ख, र ग वर्गका बैंक तथा वित्तीय संस्थाका शाखा कार्यालयहरूमा पनि कारोबारको समयमा सुकिला नोट साट्ने सुविधा उपलब्ध हुनेछ।
हरेक व्यक्तिले ५ देखि १०० रुपैयाँसम्मका नोटबाट बनेको १ सेट अर्थात् १८,५०० रुपैयाँसम्म सटही गर्न सक्ने राष्ट्र बैंकले जनाएको छ।
यस व्यवस्थाले दशैंको समयमा आवश्यक सुकिला नोट उपलब्धता र सहज कारोबार सुनिश्चित गर्ने उद्देश्य राखेको छ।