नेपाली कांग्रेसको महाधिवेशन माग गर्दै संकलित हस्ताक्षरसहितको प्रस्ताव आज दिउँसो दर्ता गरिँदैछ। पार्टी महामन्त्री गगनकुमार थापाका अनुसार, महाधिवेशन प्रतिनिधिहरूले गरेको हस्ताक्षर प्रस्ताव आज दिउँसो ३ बजे कांग्रेस पार्टी कार्यालयमा दर्ता हुनेछ।
मंगलबार महामन्त्री थापाले प्रतिनिधिहरूलाई सीमित संख्यामा बुधबार आउन र हस्ताक्षरसहितको प्रतिवेदन उपसभापति पूर्णबहादुर खड्कालाई बुझाउने व्यवस्था मिलाइएको बताएका थिए। यसअघि प्रस्ताव दर्ता गर्ने तयारी भए पनि प्रक्रिया बारम्बार सर्दै आएको थियो।
देउवाको आह्वान : पार्टीभित्र एकता र संविधानको रक्षा
जेनजी आन्दोलनपछि पहिलोपटक पार्टी कार्यालयमा सम्बोधन गर्दै सभापति शेरबहादुर देउवाले नेपालको संविधान जोखिममा परेको र प्रतिनिधि सभा असंवैधानिक तवरले विघटन गरिएको दाबी गरेका थिए। उनले पार्टीभित्र एकता कायम राख्दै विधानअनुसार १५औं महाधिवेशन सम्पन्न गर्न केन्द्रीय कार्यसमितिले निर्णय गर्ने बताएका छन्।
देउवाले कार्यवाहक सभापतिको जिम्मेवारी उपसभापति पूर्णबहादुर खड्कालाई दिएका छन्। बुधबार कार्यसम्पादन समितिको बैठक बसेर एजेन्डा तय गर्ने तयारी भएको छ।
महाधिवेशन र विशेष महाधिवेशनबीच विवाद
नेपाली कांग्रेसमा अहिले मुख्य विवाद मंसिरभित्र नियमित महाधिवेशन गर्ने वा विशेष महाधिवेशन बोलाउने विषयमा केन्द्रित छ।
- महामन्त्रीद्वय गगन थापा र विश्वप्रकाश शर्मा तथा नेता शेखर कोइराला मंसिरभित्रै नियमित महाधिवेशन गर्नुपर्ने पक्षमा छन्।
- तर, सभापति देउवा पक्षले तयारी नपुग्ने भन्दै विशेष महाधिवेशन आवश्यक नभएको धारणा लिएको छ।
हालसम्म ५४ प्रतिशत महाधिवेशन प्रतिनिधिहरूले विशेष महाधिवेशनका पक्षमा हस्ताक्षर गरिसकेका छन्।
आन्तरिक छलफल र बैठक तयारी
महामन्त्री थापा र शर्माले बुधबार दिउँसो १ बजे बस्ने भनिएको केन्द्रीय कार्यसमिति बैठकअघि नै सभापति देउवासँग छलफल गरेका थिए। उक्त छलफलले नेतृत्व परिवर्तन र आगामी फागुन २१ मा तोकिएको चुनावबारे पार्टीको धारणा तय गर्न भूमिका खेलेको बताइन्छ।
नेता शेखर कोइरालाले मंसिरभित्रै नियमित महाधिवेशन हुनुपर्ने बताउँदै भने,
“नियमित महाधिवेशन हुनुपर्छ, मंसिरभित्रै हुनुपर्छ। योभन्दा तलमाथि हुनुहुँदैन, केन्द्रीय समितिले निर्णय गर्छ।”
कांग्रेसको केन्द्रीय समिति बैठक असोज ३० गते बस्ने कार्यक्रम तय भएको छ।