नेपाली कांग्रेसमा विशेष महाधिवेशन माग गर्दै हस्ताक्षर अभियान सुरु गरिएको छ।
सोमबार काठमाडौंमा सम्पन्न बैठकपछि नेता देवराज चालिसे, गुरुराज घिमिरे, इन्द्र रिजाललगायतका महाधिवेशन प्रतिनिधिहरूले हस्ताक्षर अभियान प्रारम्भ गरेका हुन्।
भदौ २३ र २४ गतेको जेन-जी आन्दोलनपछि उत्पन्न राजनीतिक परिस्थितिलाई समीक्षा गर्दै हस्ताक्षर अभियान अघि बढाइएको हस्ताक्षर पत्रमा उल्लेख गरिएको छ।
अभियानको प्रमुख बुँदाहरू
- हालसम्म सयभन्दा बढी महाधिवेशन प्रतिनिधिले हस्ताक्षर गरेका छन्।
- अन्य प्रतिनिधिहरूलाई पनि सहभागी हुन आग्रह गरिएको छ।
- नेताहरूले विगतका गल्तीहरूको आत्मसमीक्षा गर्दै “सुधारिएको भविष्यको बाटो विशेष महाधिवेशनमै सम्भव छ” बताएका छन्।
कांग्रेस विधान अनुसारको प्रावधान
नेपाली कांग्रेसले १६५ निर्वाचन क्षेत्र, भातृ–सुभेच्छुक संस्था र विदेशस्थित जनसम्पर्क समितिबाट गरी ४,७४३ महाधिवेशन प्रतिनिधि रहेको जनाएको छ।
पार्टी विधानअनुसार, ४० प्रतिशत महाधिवेशन प्रतिनिधिले हस्ताक्षर गरेमा विशेष महाधिवेशन आह्वान गर्न सकिने व्यवस्था छ।
यसरी कांग्रेसभित्र विशेष महाधिवेशनको मागसहित हस्ताक्षर अभियान सुरु भएसँगै पार्टीमा आन्तरिक राजनीतिक हलचल तीव्र बन्ने देखिएको छ।