विरेन्द्रनगर नगरपालिकाले आगामी आर्थिक वर्ष २०८२/०८३ का लागि ४ अर्ब ३८ करोड २७ लाख १५ हजार रुपैयाँको बजेट सार्वजनिक गरेको छ। नगर उपप्रमुख नीलकण्ठ खनालले मंगलबार बसेको १७ औं नगरसभाको बैठकमा बजेट प्रस्तुत गरेका हुन्।
बजेटमा चालु खर्चका लागि १ अर्ब ५९ करोड ४२ लाख ३० हजार र पुँजीगत खर्चका लागि २ अर्ब ७८ करोड ८४ लाख ८५ हजार रुपैयाँ छुट्याइएको छ।
मुख्य आयश्रोतहरुः
विरेन्द्रनगर नगरपालिकाले विभिन्न स्रोतबाट प्राप्त हुने अनुमानित आम्दानी यस प्रकार प्रस्तुत गरेको छ:
- संघीय ससर्त अनुदान — २ अर्ब २० करोड ८ लाख
- संघीय वित्तीय समानीकरण अनुदान — २४ करोड २४ लाख
- संघीय राजस्व बाँडफाँट — २० करोड ५७ लाख ९३ हजार
- प्रदेश ससर्त अनुदान — ३७ करोड ६१ लाख ३६ हजार
- प्रदेश समानीकरण अनुदान — ३ करोड ३४ लाख ५३ हजार
- आन्तरिक आय — ५१ करोड ६३ लाख ५० हजार
- सामाजिक सुरक्षा अनुदान — ४० करोड
- सम्पत्ति, मनोरञ्जन, जग्गा रजिष्ट्रेसन कर — १५ करोड
- सेवा शुल्क — २ करोड ५० लाख
- चालु वर्षका बाँकी आयोजनाबाट — ४१ करोड २७ लाख ८३ हजार
प्रमुख योजनाहरू र बजेट विनियोजन:
भेरी पम्पिङ खानेपानी आयोजना
संघीय र प्रदेश सरकारसँगको सहकार्यमा अघि बढाइएको यस योजनाका लागि ११ करोड ६० लाख म्याचिङ फन्ड छुट्याइएको छ।
सहरी सौन्दर्यकरण र पूर्वाधार विकास
- ट्राफिक लाइट, सीसी क्यामेरा, हाइमास्ट लाइट जडान — १२ करोड
- घण्टाघर पार्क लगायत पार्क निर्माण — २२ करोड ३४ लाख
यातायात व्यवस्थापन
- नगर बस खरिद — २ करोड
वडास्तरीय गौरवका पूर्वाधार आयोजना
- प्रत्येक वडामा न्यूनतम ५० लाख लागतका योजनाहरू — १९ करोड २८ लाख
नगरको दीर्घकालीन लक्ष्य:
विरेन्द्रनगरलाई:
- शैक्षिक, प्रशासनिक र पर्यटकीय सहर
- महिला मैत्री, समावेशी र सहभागी नगरपालिका
- सरसफाइयुक्त, वातावरणमैत्री र व्यवस्थापित राजधानी
का रूपमा विकास गर्ने बजेटको मूल उद्देश्य रहेको उपप्रमुख खनालले बताए।