प्रधानमन्त्री सुशीला कार्कीले बिहीबार पहिलो पटक राष्ट्रका नाममा सम्बोधन गर्ने कार्यक्रम तय भएको छ।
प्रधानमन्त्री तथा मन्त्रिपरिषद्को कार्यालयका अनुसार बिहीबार दिउँसो ४ः०० बजे मन्त्रिपरिषद्को बैठक बस्नेछ भने साँझ ६ः०० बजे प्रधानमन्त्री कार्कीले राष्ट्रका नाममा सम्बोधन गर्ने कार्यतालिका तय गरिएको छ।
जेन–जी आन्दोलनपछि गठित सरकारको नेतृत्व
प्रधानमन्त्री कार्की भदौ २७ गते पूर्वप्रधानन्यायाधीशबाट प्रधानमन्त्री पदमा नियुक्त भएकी थिइन्। उनी जेन–जी आन्दोलनपछि गठन भएको अन्तरिम सरकारको नेतृत्वमा रहेकी छिन्।
भदौ २३ र २४ गतेको आन्दोलनपछि गठन भएको सरकारले प्रतिनिधिसभा विघटन गरी आगामी फागुन २१ गतेको निर्वाचन घोषणा गरिसकेको छ।
मन्त्रिपरिषद् विस्तार र प्राथमिक कार्यभार
उनको नेतृत्वमा तेस्रो पटक मन्त्रिपरिषद् विस्तार भएको छ। वर्तमान सरकारको प्राथमिक कार्यभार फागुन २१ सम्म निर्वाचन सम्पन्न गराउनु रहेको छ।
प्रधानमन्त्री कार्कीको पहिलो राष्ट्रव्यापी सम्बोधनले आगामी निर्वाचन र सरकारको प्राथमिकताका विषयमा स्पष्टता ल्याउने अपेक्षा गरिएको छ।