अमेरिकामा अवैध रूपमा बसोबास गर्ने आप्रवासीहरूको संख्या इतिहासकै उच्च बिन्दुमा पुगेको छ। प्यु रिसर्च सेन्टर (पीआरसी) ले सार्वजनिक गरेको तथ्यांकअनुसार, सन् २०२३ मा कागजातविहीन आप्रवासीको संख्या १ करोड ४० लाख पुगेको छ, जुन सन् २०२२ को भन्दा २२ लाखले बढी हो।
यसअघि सन् २००७ मा अवैध आप्रवासीको संख्या १ करोड २२ लाख थियो। पछिल्ला वर्षहरूमा झन्डै ६० लाख आप्रवासी विभिन्न कानुनी संरक्षणमा अमेरिका पुगेका थिए, तर पूर्व राष्ट्रपति डोनाल्ड ट्रम्पले जनवरी २०२५ मा पदभार सम्हालेपछि तीमध्ये धेरैजसो संरक्षण प्रावधान हटाएका थिए।
पीआरसीको प्रतिवेदनले सन् २०२४ मा पनि अवैध आप्रवासीको संख्या बढेको प्रारम्भिक तथ्यांक देखाएको छ। तत्कालीन राष्ट्रपति जो बाइडेनले सन् २०२५ को जुनमा सीमामा शरण नीतिलाई कडा बनाएपछि वृद्धिदर केही सुस्त भएको छ।
अमेरिकामा सबैभन्दा धेरै अवैध आप्रवासी मेक्सिकोबाट आएका छन्। त्यसपछि ग्वाटेमाला, एल साल्भाडोर र भारत प्रमुख स्रोत देश हुन्। पछिल्लो दुई वर्षमा भेनेजुएला, क्युबा, कोलम्बिया, निकारागुआ, इक्वेडर, युक्रेन र पेरुबाट आउनेहरूको संख्या दोब्बरभन्दा बढी भएको छ।
सन् २०२३ को तथ्यांकअनुसार, ४३ लाख मेक्सिकन आप्रवासी र अन्य देशहरूबाट ९७ लाख अवैध आप्रवासी रहेका छन्। क्यालिफोर्निया, टेक्सास, फ्लोरिडा, न्युयोर्क, न्युजर्सी र इलिनोइसमा सबैभन्दा धेरै बसोबास रहेको देखाइएको छ।