वीरगन्जमा शुक्रबार बिहान भएको सडक दुर्घटनामा दुई युवाले ज्यान गुमाएका छन् भने एक जना गम्भीर घाइते भएका छन्।
वीरगन्ज महानगरपालिका–२२ स्थित सिताराम चोकमा सडकमा रोकिएको ट्रक (HR55K 3971) मा मोटरसाइकल (प्रदेश ०३–००४ प ८६१२) ठोक्किँदा दुर्घटना भएको हो। मोटरसाइकलमा सवार तीनै जना गम्भीर घाइते भएका थिए।
पर्सा जिल्लाको छिपहरमाई गाउँपालिका–३ झलमहियाका २३ वर्षीय रामाकान्त यादव र विजय यादवको नारायणी अस्पतालमा उपचारको क्रममा मृत्यु भएको प्रहरीले जनाएको छ। उनीहरूलाई गम्भीर अवस्थामा अस्पताल लगिएको थियो तर ज्यान जोगाउन सकिएन।
त्यस्तै, २२ वर्षीय विजयकुमार यादवको नारायणी अस्पतालमै उपचार भइरहेको छ। उनकी अवस्था गम्भीर रहेको प्रहरी स्रोतले जनाएको छ।
घटनापछि ट्रक चालक फरार रहेको र उनको खोजी भइरहेको प्रहरी नायब उपरीक्षक (डीएसपी) किशोर लम्सालले जानकारी दिएका छन्। हाल घटनाबारे थप अनुसन्धान भइरहेको प्रहरीले जनाएको छ।