बाजुराको बुढीगङ्गा नगरपालिका–६ स्थित बाम्का बजारमा शुक्रबार दिउँसो भएको भीषण आगलागीबाट कम्तीमा ३० वटा पसल जलेर पूर्णरूपमा नष्ट भएका छन्। आगलागी खाना पकाउने ग्यास सिलिन्डर विस्फोटपछि भएको हो।
प्रहरी नायव उपरीक्षक इकवाल हवारीका अनुसार नवदुर्गा होटलमा ग्यास सिलिन्डर विस्फोट भएपछि आगो फैलिएको थियो। आगलागीले खुद्रा सामान र कपडा बिक्री गर्ने स्थानीय व्यवसायीका टिनको छाना भएका पसलहरू पूर्ण रूपमा नष्ट पारेको छ।
घटनास्थलको निरीक्षणपछि जिल्ला विपद् व्यवस्थापन समितिका संयोजक तथा प्रमुख जिल्ला अधिकारी (सीडीओ) मेघनाथ पाध्याले पीडितहरूलाई तत्काल राहत उपलब्ध गराउन प्रदेश र संघ सरकारसँग माग गरिएको जानकारी दिए। उनका अनुसार, प्रहरी र स्थानीय प्रशासनले क्षतिको विवरण संकलन गरिरहेको छ र उक्त विवरणका आधारमा पीडितलाई आवश्यक राहत उपलब्ध गराउने प्रक्रिया अघि बढाइनेछ।
घटनापछि बसेको आकस्मिक बैठकमा बुढीगङ्गा नगरपालिकाका नगरप्रमुख रामबहादुर बानियाँ, बडीमालिका नगरपालिकाका नगरप्रमुख अमरबहादुर खड्का, पूर्व सांसद लालबहादुर थापा लगायत सरोकारवालाहरूको उपस्थिति थियो। बैठकले एकद्वार प्रणालीमार्फत पीडितहरूलाई राहत वितरण गर्ने निर्णय पनि गरेको छ।
दमकलको अभावले थप क्षति
जिल्लामा आगलागी नियन्त्रणका लागि आवश्यक दमकल नभएको समस्याले राहत र नियन्त्रण कार्यमा थप कठिनाइ भएको देखिएको छ। यद्यपि जिल्लाका ९ वटै पालिकामा गाडी भए पनि दमकलको व्यवस्था अझै नभएको पाइयो। आगलागीबाट करोडौँ रुपैयाँ बराबरको क्षति भएको अनुमान गरिएको छ।