काठमाडौं महानगरपालिकाका मेयर **बालेन्द्र शाह (बालेन)**ले हालै सिंहदरबारमा आगलागी हुँदा महानगरको दमकल तत्काल पुग्न नसक्नुको कारण आन्दोलनकारीको अवरोध भएको स्पष्ट पारेका छन्।
मंगलबार सामाजिक सञ्जालमार्फत उनले भनेका छन्,
“सिंहदरबार जलेको लगत्तै दमकल पठाउने प्रयास गरिएको थियो, तर आन्दोलनकारीको अवरोधका कारण तत्काल पुग्न सकेन। भीड शान्त भएपछि मात्रै साँझ ८:१५ बजे काठमाडौं महानगरको दमकल त्यहाँ पुगेको थियो।”
मेयर बालेनका अनुसार नेपाली सेनाको दमकल सिंहदरबारभित्रै हुँदा पनि हुलका कारण काम गर्न सकेको थिएन। उनले आन्दोलनको बेला पनि महानगरको टोली निरन्तर रुपमा उद्धार, स्वास्थ्य सहायता, र आगो निभाउने कार्यमा सक्रिय रहेको बताए।
उनका अनुसार महानगरमा ५ वटा दमकल सञ्चालनमा छन् — न्युरोडमा २, बालाजुमा २ र रामहिटीमा १ वटा। ती दमकलमा १४ जना नगर प्रहरी र ३० जना सशस्त्र प्रहरी गरी ४४ जनाको टोली तीन सिफ्टमा खटिने गर्छ।
बालेनका अनुसार आन्दोलनको क्रममा २३ देखि २८ गतेसम्म काठमाडौंका विभिन्न स्थानहरू — संसद भवन, सर्वोच्च अदालत, जिल्ला प्रशासन कार्यालय, भाटभटेनी, डाटा सेन्टर र निजी घरहरूसमेतमा ५५ पटकभन्दा बढी दमकल परिचालन गरिएको थियो।
उनले जनाएका छन् कि आन्दोलनका बेला महानगरको टोलीले घाइतेहरूको उपचार, अस्पतालमा औषधि र रगतको व्यवस्था, लास व्यवस्थापन, खाना वितरण र उद्धार कार्यमा सक्रिय भूमिका खेलेको थियो।
बालेनले मिडियालाई सत्य तथ्यमा आधारित भएर समाचार लेख्न आग्रह गर्दै भनेका छन्,
“हल्ला र आरोपले जनतालाई भ्रममा पार्छ र जोखिम मोल्ने टोलीको मनोबल घटाउँछ। सत्य बुझौं, अफवाह फैलाउँनुहुदैन।”
उनले अन्त्यमा भने,
“देशलाई अहिले एकता र सत्यको आवश्यकता छ, हल्ला र झूटको होइन।”