बायर्न म्युनिखले शनिबारको खेलमा अर्जेन्टिनाको बोका जुनियर्सलाई २–१ गोलले पराजित गर्दै फिफा क्लब विश्वकपको नकआउट चरणमा स्थान सुरक्षित गरेको छ।
बायर्नका लागि ह्यारी केनले पहिलो गोल गर्दै खेलको सुरुवातमै अग्रता दिलाएका थिए। तर, बोका जुनियर्सका म्यागुएल मेरेनटाइले खेल बराबरीमा ल्याए। अन्त्यतिर माइकल ओलिसले निर्णायक गोल गर्दै बायर्नलाई महत्त्वपूर्ण जित दिलाए।
यस जितसँगै बायर्नले युरोपेली टोलीहरुले दक्षिण अमेरिकी क्लबहरूसँग खेलेका पछिल्ला पराजयको शृंखला अन्त्य गरेको छ। पेरिस सेन्ट जर्मेन (पीएसजी) र चेल्सीको हारपछि यो जितले यूरोपेली गौरव जोगाएको हो।
ह्यारी केनको प्रतिक्रिया:
“खेल निकै कठिन थियो। हामीलाई थाहा थियो, सजिलो हुने छैन। मौसमको गर्मीले खेलाडीलाई धेरै गाह्रो भयो। हामी पहिलो हाफमै अग्रता लिइसकेको भए दबाब कम हुन्थ्यो,” उनले भने।
स्टेडियममा रेकर्ड भीड:
खेल हार्डरक स्टेडियममा ६३ हजारभन्दा बढी दर्शक उपस्थित थिए।
बोका जुनियर्सको प्रतिक्रिया:
गोलकिपर मारचेसिनले भने, “हामी दुःखी छौं तर टिमको प्रदर्शनमा गर्व छ। आगामी खेलमा अझ राम्रो गर्नेछौं भन्ने आत्मविश्वास बढेको छ।”
अंक तालिका अनुसार:
- बायर्न म्युनिख: २ खेलबाट ६ अंक
- बेनफिका: ४ अंक
- बोका जुनियर्स: २ खेलबाट १ अंक
- अकल्यान्ड सिटी: प्रतियोगिताबाट बाहिर (० अंक)
बायर्नले पहिलो खेलमा अकल्यान्ड सिटीलाई १०–० ले हराएको थियो, जबकि बेनफिकाले अकल्यान्डमाथि ६–० को जित निकालेको थियो।
समूह ‘D’ को रोमाञ्चक खेल:
फ्लेमिङ्गोले दोस्रो हाफमा उत्कृष्ट प्रदर्शन गर्दै चेल्सीलाई ३–१ ले हराएको छ। चेल्सीका पेड्रो नेटोले अग्रता दिलाए पनि टोलीले त्यसलाई कायम राख्न सकेन। फ्लेमिङ्गोका ब्रुनो हेनरिक, डानिलो र वालेस यानले एक/एक गोल गरे।
चेल्सीका निकोलस ज्याक्सन ६८औं मिनेटमा रातो कार्ड पाएपछि टोली १० खेलाडीमा सीमित भयो।
प्रशिक्षक फिलिप लुइस भन्छन्:
“हामीलाई थाहा थियो, हाम्रो क्षमताअनुसार खेले चेल्सीलाई हराउन सकिन्छ।”
समूह ‘D’ मा फ्लेमिङ्गोले सुरुवातका दुवै खेल जित्दै नकआउट चरणमा प्रवेश गरिसकेको छ।
बायर्न म्युनिखको जितले यूरोपेली क्लबको आत्मविश्वास बढाएको छ भने दक्षिण अमेरिकी क्लबहरूलाई चेतावनी दिएको छ। क्लब विश्वकपमा हुने बाँकी खेलहरू अझै रोमाञ्चक हुने संकेत मिलेको छ।