लाङटाङ भ्रमणमा गएका भक्तपुरका चार जना युवायुवती बाढीले बगाएका छन्। शनिबार साँझ रसुवाको गोसाइँकुण्ड गाउँपालिका–४ वेरिङखोला पार गर्ने क्रममा बाढी आएको र उनीहरू बेपत्ता भएको जिल्ला प्रशासन कार्यालय रसुवाले जनाएको छ।
प्रमुख जिल्ला अधिकारी राजेश पन्थीका अनुसार बेपत्ता हुनेहरूमा मध्यपुरठिमी नगरपालिकाकी संकृति श्रेष्ठ, किशन श्रेष्ठ, संगीता श्रेष्ठ र भक्तपुर नगरपालिका–१० का रवि श्रेष्ठ रहेका छन्।
प्रजिअ पन्थीले बताएअनुसार उनीहरू १६ जनाको समूहमा लाङटाङ भ्रमणका लागि निस्केका थिए। समूहका ८ जना पहिले नै घोडातबेला पुगेका थिए भने पछिल्लो टोलीका ८ जनामध्ये ४ जनालाई बाढीले बगाएको हो।
शेष टोली अहिले स्थानीय होटेलमा सुरक्षित राखिएको छ।
नेपाली सेना र नेपाल प्रहरीको खोज तथा उद्धार टोली बेपत्ताहरूको खोजीमा खटिएको जिल्ला प्रशासनले जनाएको छ।
यसैबीच, हिमाली रसुवास्थित लाङटाङखोला र स्याफ्रुबेसी जलमापन केन्द्रमा पानीको सतह सतर्कता तह पार गरेको छ। अधिकारीहरूले नदी किनार तथा होचो भूभागमा बसोबास गर्नेहरूलाई उच्च सतर्कता अपनाउन आग्रह गरेका छन्।